مہاراشٹر کے سابق وزیر انیس احمد کانگریس میں شامل، 5 دنوں میں ہی ہو گئی گھر واپسی

پرکاش امبیڈکر کی پارٹی وَنچت بہوجن اگھاڑی (وی بی اے) کے لیڈر انیس احمد 29 اکتوبر کو پرچہ نامزدگی داخل کرنے سے محروم رہ گئے تھے، اور اب انھوں نے وی بی اے کو چھوڑ کر کانگریس کی رکنیت اختیار کرنے کا اعلان کر دیا۔ آج کانگریس میں ان کی باضابطہ گھر واپسی ہو گئی اور انھیں ایک پریس کانفرنس کے دوران کانگریس کی رکنیت دلائی گئی۔

قابل ذکر ہے کہ 28 اکتوبر کو ہی انیس احمد نے کانگریس چھوڑ کر وی بی اے کی رکنیت اختیار کی تھی۔ اب محض 5 دنوں بعد ہی انھوں نے پھر سے کانگریس میں شامل ہونے کا فیصلہ کیا۔ گزشتہ 29 اکتوبر کو انھوں نے دعویٰ کیا تھا کہ دوپہر 3 بجے سے قبل دفتر پہنچنے کے باوجود انھیں پرچہ نامزدگی داخل کرنے کی اجازت نہیں ملی۔ انیس احمد 3 بار رکن اسمبلی رہ چکے ہیں اور مہاراشٹر میں کانگریس حکومت میں کابینہ وزیر تھے۔

ہفتہ کے روز ممبئی میں کانگریس مہاراشٹر انچارج رمیش چنیتھالا کی موجودگی میں انھوں نے باضابطہ طور پر پارٹی کی رکنیت حاصل کی۔ انیس احمد جو کبھی کانگریس کے آنجہانی لیڈر احمد پٹیل کے انتہائی قریبی تھے اور گاندھی فیملی کے وفادار بھی تھے، کو کانگریس نے ان کی روایتی ناگپور شمال سیٹ سے ٹکٹ دینے سے منع کر دیا تھا۔ اس حلقہ میں مسلم اور ہلبا طبقہ کے ووٹوں کی تعداد کافی زیادہ ہے۔ کانگریس نے 2019 کے اسمبلی انتخاب میں دوسرے مقام پر رہے یوتھ لیڈر بنٹی شیلکے کو اس بار یہاں سے ٹکٹ دینا پسند کیا۔