کیرالہ کے سابق وزیر اعلیٰ اور کانگریس کے سینئر لیڈر اومن چانڈی کا انتقال، بنگلورو کے اسپتال میں لی آخری سانس
کیرالہ میں کانگریس کے تجربہ کار رہنماؤں میں سے ایک اومن چانڈی کیرالہ کے وزیر اعلیٰ رہ چکے تھے۔ 2022 میں انہوں نے کیرالہ میں سب سے زیادہ وقت تک کانگریس کے رکن اسمبلی رہنے کا ریکارڈ بنایا
![<div class="paragraphs"><p>اومن چانڈی / آئی اے این ایس</p></div>](https://media.assettype.com/qaumiawaz%2F2023-07%2F98989745-f046-4120-988c-1b91565c9e06%2Fooman_chandy.jpg?rect=0%2C19%2C4200%2C2363&auto=format%2Ccompress&fmt=webp)
اومن چانڈی / آئی اے این ایس
کیرالہ کے سابق وزیر اعلی اور کانگریس کے سینئر رہنما اومن چانڈی کا منگل (18 جولائی) کو انتقال ہو گیا۔ وہ کانگریس لیڈر راہل گاندھی کے ساتھ بھارت جوڑو یاترا میں بھی نظر آئے تھے۔ کیرالہ کانگریس کے صدر کے سدھاکرن اور چانڈی کے رشتہ داروں نے منگل کو ان کے انتطال کی اطلاع دی۔ کانگریس کے تجربہ کار لیڈر اومن چانڈی کی عمر 79 برس تھی۔
کے سدھاکرن نے ٹوئٹ کیا، "اس بادشاہ کی کہانی جس نے 'محبت' کی طاقت سے دنیا کو فتح کیا، اس کا ایک دردناک انجام ہے۔" آج، میں ایک لیجنڈ اومن چانڈی کے انتقال سے بہت افسردہ ہوں۔ انہوں نے لاتعداد افراد کی زندگیوں کو چھوا اور ان کی میراث ہمیشہ ہماری روحوں میں گونجتی رہے گی۔‘‘
اومن چانڈی کے فیس بک پیج پر ان کے بیٹے نے لکھا کہ ان کے والد اب اس دنیا میں نہیں رہے۔ کیرالہ کے دو بار کے وزیر اعلیٰ اومن چانڈی نے منگل کو بنگلورو میں آخری سانس لی۔ معلومات کے مطابق چانڈی طویل عرصے سے بیمار تھے اور بنگلورو کے ایک اسپتال میں زیر علاج تھے۔
کیرالہ کانگریس نے چانڈی کے انتقال پر کہا کہ اومن چانڈی کو تمام نسلوں اور آبادی کے تمام طبقات پیار کرتے تھے۔ کیرالہ کانگریس نے ٹوئٹ کیا ’’ہمارے سب سے پیارے رہنما اور سابق وزیر اعلی کو الوداع کرنا بہت افسوسناک ہے۔ اومن چانڈی کیرالہ کے سب سے مقبول اور منفرد لیڈروں میں سے ایک تھے۔ چانڈی سر کو ہر نسل اور طبقے کے لوگ پیار کرتے تھے۔ کانگریس خاندان ان کی قیادت اور توانائی کی کمی محسوس کرے گا۔‘‘
اومن چانڈی 2004 اور 2011 کے درمیان دو بار کیرالہ کے وزیر اعلیٰ رہے۔ تجربہ کار کانگریس لیڈر نے 27 سال کی عمر میں 1970 کے ریاستی اسمبلی انتخابات جیت کر ایم ایل اے کے طور پر اپنے دور کا آغاز کیا۔ اس کے بعد اس نے مسلسل 11 انتخابات جیتے ہیں۔ چانڈی نے گزشتہ 5 دہائیوں میں صرف اپنے آبائی حلقے پوتھوپلی کی نمائندگی کی ہے۔
2022 میں وہ 18728 دنوں تک ایوان میں پوتھوپلی کی نمائندگی کرتے ہوئے ریاستی اسمبلی کے سب سے طویل عرصے تک خدمت کرنے والے رکن بن گئے۔ انہوں نے کیرالہ کانگریس (ایم) کے سابق سپریمو آنجہانی کے ایم منی کے ریکارڈ کو پیچھے چھوڑ دیا۔ اپنی سیاسی اننگز کے دوران چانڈی نے مختلف کابینہ میں چار بار وزیر اور چار بار ریاستی اسمبلی میں اپوزیشن لیڈر کے طور پر کام کیا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔