سابق وزیرِ خزانہ ارون جیٹلی کے انتقال پر اہم شخصیات کا اظہار تعزیت

نئی دہلی: سابق وزیر خزانہ اور بھارتیہ جنتا پارٹی کے سینئر لیڈر ارون جیٹلی کا سنیچر کو آل انڈیا انسٹی ٹیوٹ آف میڈیکل سائنسز (ایمس) میں انتقال ہوگیا۔ ان کے انتقال پر ملک کی اہم شخصیات کی جانب سے تعزیت کا اظہار کیا گیا ہے۔

وزیر اعظم نریندر مودی نے جیٹلی کی اہلیہ اور بیٹے سے بات کر کے تعزیت کا اظہار کیا۔ میڈیا رپورٹوں کے مطابق دونوں نے وزیر اعظم مودی سے اپنا بیرون ملک کا دورہ منسوخ نہ کرنے کو کہا ہے۔ وزیر اعظم نے ٹوئٹ کر کے کہا، ’’ارون جیٹلی ایک سیاسی قدآور اور قانون کے معلم تھے۔ وہ ایک ایسے رہنما تھے جنہوں نے ہندوستان کی ترقی میں تعاون کیا۔‘‘

ارون جیٹلی کے انتقال کے بعد وزیر داخلہ امت شاہ نے اپنا حیدراباد کا دورہ مختصر کر دیا ہے۔ انہوں نے ٹوئٹ کر کے کہا، ’’ارون جیٹلی کے انتقال سے انتہائی دکھی ہوں۔ جیٹلی جی کا جانا میرے لئے ذاتی خسارہ ہے۔ ان کے روپ میں میں نے نہ صرف تنظیم کا ایک اعلیٰ رہنما کھویا ہے بلکہ خاندان کا ایک ایسا اٹوٹ رکن بھی کھو دیا ہے جس کی قربت اور رہنمائی مجھے برسوں تک حاصل ہوتی رہی۔‘‘

کانگریس کے سینئر رہنما اور سابق مرکزی وزیر ششی تھرور نے ٹوئٹ کر کے جیٹلی کے انتقال پر افسوس کا اظہار کیا۔ انہوں نے لکھا، ’’اپنے دوست اور دہلی یونیورسٹی کے سینئر طالب علم کے انتقال پر بے حد دکھی ہوں۔ ہماری پہلی ملاقات اس وقت ہوئی تھی جب وہ دہلی یونیورسٹی طلبا یونین میں تھے اور میں سینٹ اسٹیفن کالج یونین کا سربراہ تھا۔ سیاسی اختلافات ہونے کے باوجود ہم ایک دوسرے کی عزت کرتے تھے اور اکثر بحث کرتے تھے۔ ‘‘

کانگریس پارٹی کی طرف سے بھی ارون جیٹلی کے انتقال پر افسوس کا اظہار کیا گیا ہے۔ کانگریس کے آفیشیل ٹوئٹر ہینڈل سے لکھا گیا، ’’ارون جیٹلی کے انتقال کی خبر افسوس ناک ہے۔ ہماری تعزیت ان کے اہل خانہ کے ساتھ ہے اور غم کے اس وقت میں ہم ان کے لئے دعا گو ہیں۔

واضح رہے کہ ارون جیٹلی کے اہل خانہ میں ان کی بیوی، ایک بیٹا اور ایک بیٹی ہے۔ وہ 9 اگست سے ایمس میں داخل تھے۔ ان کی پیدائش 1952 میں دہلی میں ہوئی تھی اور 1974 میں انہوں نے سیاست کی شروعات کی تھی۔

واجپئی حکومت کے دوران انہیں 13 اکتوبر 1999 کو اطلاعات و نشریات کا وزیرمملکت (آزادنہ چارج) مقرر کیا گیا۔ انہیں وزیر مملکت برائے سرمایہ کشی (آزادانہ چارج) بھی مقرر کیا گیا۔ مودی حکومت کی پہلی مدت کار میں وہ وزیر خزانہ بنے تھے۔

جیٹلی 1982 میں جموں وکشمیر کے سابق وزیر خزانہ گردھاری لال ڈوگرہ کی بیٹی سنگیتا کے ساتھ رشتہ ازدواج میں بندھ گئے تھے۔ جیٹلی کے اہل خانہ میں بیوی، بیٹا روہن اور بیٹی سونالی ہیں۔