متھرا: اسکان مندر میں غیر ملکی بھکتوں کے داخلے پر پابندی، بیوہ خواتین کا ہولی پروگرام بھی رد

ویسے تو کورونا وائرس کی وجہ سے پوری دنیا میں دہشت کا ماحول دیکھا جا رہا ہے، لیکن ہندوستان میں دیگر ریاستوں کے مقابلے اتر پردیش میں احتیاطی اقدام زیادہ ہی دیکھنے کو مل رہے ہیں۔ موصولہ اطلاعات کے مطابق اتر پردیش کے متھرا واقع ’اسکان مندر‘ میں کسی بھی غیر ملکی بھکت کی انٹری پر پابندی عائد کر دی گئی ہے۔ یہ پابندی دو مہینے کے لیے لگائی گئی ہے اور امکان ظاہر کیا جا رہا ہے کہ اس وقت تک کورونا وائرس کا اثر ختم ہو جائے گا۔

میڈیا ذرائع سے موصول ہو رہی خبروں کے مطابق کورونا وائرس کے بڑھتے اثر کو دیکھتے ہوئے ایک بڑا قدم یہ بھی اٹھایا گیا ہے کہ 7 مارچ کو اس اجتماعی ہولی تقریب کو بھی رد کر دیا گیا ہے جو بیوہ خواتین کے لیے مخصوص تھی۔ دراصل آگرہ میں کورونا وائرس کے 6 مریض ملنے کے بعد پوری ریاست میں ہنگامی حالت دیکھنے کو مل رہی ہے۔ لکھنؤ میں تو ضلع مجسٹریٹ نے گوشت اور مچھلی کو کھلی جگہوں پر فروخت کرنا ممنوع قرار دے دیا ہے۔

واضح رہے کہ ہندوستان میں اب تک کورونا وائرس کے 29 مریض سامنے آ چکے ہیں کئی مشتبہ مریضوں کا بلڈ سیمپل جانچ کے لیے لیا گیا ہے۔ نوئیڈا میں بھی کورونا وائرس کو لے کر کافی دہشت ہے۔ یہاں اب تک دو اسکول بند کر دیئے گئے ہیں۔ اس درمیان بتایا جا رہا ہے کہ کورونا وائرس کی جانچ کے لیے ہوائی اڈوں پر ’پری-امیگریشن‘ ایریا میں اضافی کاؤنٹر، معالج، علاج کی مشینیں اور ترمیم شدہ فارم موجود ہوں گے۔