کورونا: ہریانہ میں ہوئی پہلی موت، 67 سالہ بزرگ علاج کے دوران ہلاک

ہریانہ میں بھی کورونا وائرس کی وجہ سے موت کی شروعات ہو چکی ہے۔ بدھ کے روز چنڈی گڑھ کے پی جی آئی میں علاج کرا رہے انبالہ کے 67 سالہ بزرگ کا انتقال کورونا انفیکشن کی وجہ سے ہو گیا۔ بتایا جاتا ہے کہ مہلوک کا نام ہرجیت سنگھ کوہلی ہے اور وہ انبالہ چھاؤنی واقع ٹمبر مارکیٹ میں رہتے تھے۔ کورونا وائرس کی علامت پائے جانے کے بعد وہ انبالہ شہر کے ایک پرائیویٹ اسپتال میں علاج کے لیے پہنچے تھے، پھر چھاؤنی کے سٹی ہاسپیٹل گئے اور وہاں سے پی جی آئی میں داخل کرایا گیا تھا۔

واضح رہے کہ بدھ کے روز ہریانہ کے تین کورونا پازیٹو مریض ٹھیک ہو کر اسپتال سے گھر پہنچ گئے جو ایک اچھی خبر ہے۔ یہ تینوں مریض گروگرام کے ایک اسپتال میں داخل تھے۔ ان تینوں کو ملا کر اب تک ریاست میں 13 لوگ کورونا انفیکشن سے جنگ جیت کر گھر پہنچ چکے ہیں۔ محکمہ صحت کی رپورٹ کے مطابق گزشتہ 24 گھنٹے میں 65 مشتبہ لوگوں کو اسپتال میں داخل کرایا گیا ہے اور 26 نئے سیمپل لیے گئے ہیں۔

ہریانہ میں مجموعی طور پر اب تک 29 کورونا پازیٹو کیس سامنے آئے ہیں۔ اس میں سب سے زیادہ 10 گروگرام کے ہیں۔ اس کے بعد فریدآباد میں 6، پانی پت میں 4، سرسا میں 3، پنچکولہ میں 2، انبالہ، پلول، سونی پت اور حسار میں 1-1 مریض ملا ہے۔ ان 29 مریضوں میں سے 13 ٹھیک ہو کر گھر واپس پہنچ چکے ہیں۔ گویا کہ ایکٹیو کیس کی تعداد اس وقت 16 ہے۔