یوپی کے مختلف شہروں میں بھڑکی ’اگنی پتھ اسکیم‘ کی آگ، سراپا احتجاج نوجوانوں سے یوگی کی اپیل

لکھنؤ: مرکزی حکومت کی فوج میں تقرری کے لئے لائی گئی نئی اسکیم ’اگنی پتھ‘ کے خلاف ملک بھر کے نوجوانوں کا غصہ پھوٹ پڑا ہے۔ اس اسکیم کے خلاف بہار سے شروع ہونے والی احتجاج کی آگ اب دوسری ریاستوں میں بھی بھڑک گئی ہے۔ اتر پردیش کے مختلف شہروں میں نوجوانوں نے جمعرات کے روز شدید احتجاج کیا۔ وہیں ریاست کے وزیر اعلی یوگی آدتیہ ناتھ نے اس اسکیم کے حوالے سے نوجوانوں کو کسی بھی قسم کے بہکاوے میں نہ آنے کی نصیحت دی ہے۔

موصول رپورٹ کے مطابق نوجوانوں نے بلند شہر، گونڈہ، گورکھپور، علی گڑھ، اناؤ، ہاتھرس، فیروزآباد اور آگرہ میں احتجاجی مظاہرہ کرتے ہوئے حکومت سے فوج میں تقرری کے پرانے طریقہ کار کو بحال کرنے کا مطالبہ کیا۔ بلند شہر میں فوج کی تیاری کرنے والے نوجوانوں نے مرکزی حکومت کی اس نئی اسکیم کے خلاف بھور کراسنگ اور کھرجا بس اسٹینڈ پر احتجاجی مظاہرے کرتے ہوئے قومی پرچم کو لہرایا۔

سراپا احتجاج نوجوانوں نے اگنی پتھ اسکیم کو نوجوانوں کے مستقبل اور کیریئر سے کھلواڑ قرار دیتے ہوئے کہا کہ کسی کو بھی اس بات کی فکر نہیں ہے کہ محض چار سالوں کے اندر سبکدوش ہونے والے اگنی ویروں کو دوبارہ روزگار کہاں اور کیسے ملے گا۔ انہوں نے کہا کہ وہ متعدد مہینوں سے فوج میں تقرری کے لئے تیاریاں کر رہے تھے۔ لیکن اگنی پتھ اسکیم کا اعلان کر کے حکومت نے ان کے مستقبل کو تاریک کر دیا ہے۔

سہارنپور کے سینئر سپرنٹنڈنٹ آف پولیس نے بتایا کہ کچھ نوجوان نعرے بازی کرتے ہوئے سڑکوں پر نکلے تھے لیکن انہیں مطمئن کر کے واپس بھیج دیا گیا۔ انہوں نے کہا کہ پولیس الرٹ ہے اور نظر بنائے ہوئے ہے ضلع میں کہیں بھی کسی قسم کے احتجاج و مظاہرے و دھرنے کی کوئی اطلاع نہیں ہے۔

ضلع آگرہ میں حکومت کی اس اسکیم سے مشتعل نوجوانوں نے متعدد مقامات پر احتجاج کیا اور باہ میں بس کو نقصان پہنچایا۔ صدر علاقے میں آرمی تقرری آفس سے شروع ہونے والا احتجاج شہر کے دیگر حصوں میں پھیل گیا۔ مظاہرین نے آگرہ۔لکھنؤ اپکسپریس وے کو بھی بلا ک کردیا۔ مظاہرین نے ایم جی روڈ کو بھی بلاک کر دیا جس سے ٹریفک جام ہو گیا۔

ٹریفک جام و روڈ بلاک کی خبر ملتے ہی سینئر افسران موقع پر پہنچے اور مظاہرین سے بات کی۔ اس دوران نوجوانوں نے کہا کہ 20جون تک مرکزی حکومت سے اس اسکیم کو واپس لے لینا چاہئے بصورت دیگر وہ دہلی کی جانب مارچ کرنے کومجبور ہوں گے۔

ریاست کے مختلف شہروں سے احتجاج کے دوران وزیر اعلی یوگی آدتیہ ناتھ نے ٹوئٹر کا سہارا لیا اور نوجوانوں کو مخاطب کرتے ہوئے لکھا ’نوجوان ساتھیو! اگنی پتھ اسکیم آپ کے زندگی کو نئے ایام فراہم کرنے کے ساتھ ہی روشن مستقبل کی بنیاد بنے گی آپ کسی بہکاوے میں نہ آئیں۔ انہوں نے آگے لکھا مادر ہند کی خدمت کے جذبے سے سرشار ہمارے ’اگنی ویر‘ قوم کا بیش قیمتی سرمایہ ہوں گے اور یوپی حکومت اگنی ویروں کو پولیس و دیگر خدمات میں ترجیح دے گی‘۔

قابل ذکر ہے کہ 14 جون کو وزیر دفاع راج ناتھ سنگھ نے فوج میں تقرری کے لئے حکومت کی نئی اسکیم ’اگنی پتھ‘ کا اعلان کیا تھا۔ حکومت نے اس اسکیم کا مقصد فوج میں اصلاحات کے دعوی کے ساتھ جوانوں کی عمر 32 سال سے کم کر کے گذشتہ 6۔7سالوں میں 26 سال کرنے کو بتایا ہے۔ اس اسکیم کے مطابق چار سال کی تکمیل کے بعد 25 فیصدی اگنی ویروں کو ریگولر کیڈر کے طور پر لیا جائے گا جبکہ 100 فیصدی امیدوار والنٹری بنیاد پر ریگولر کیڈر کے لئے درخواست دے سکیں گے۔

اس اسکیم کے مطابق اگنی ویروں کو پرکشش ماہانہ مشاہرے کے ساتھ تینوں افواج میں ملنے والے الاونسز دئیے جائیں گے۔ اور چار سالوں کی خدمت مکمل ہونے کے بعد اگنی ویروں کو ’سیوا ندھی‘ پیکج دیا جائے گا۔