ممبئی: 33 منزلہ عمارت میں لگی آگ، دیپیکا یہیں رہتی ہیں

ممبئی کے ورلی علاقہ میں اس وقت افراتفری کا ماحول پیدا ہو گیا جب ایک 33 منزلہ عمارت میں آگ لگ گئی۔ عمارت کی 32 ویں منزل میں لگی آگ کو بجھانے کے لئے فائر بریگیڈ کی 8 گاڑیاں موقع پر پہنچی ہوئی ہیں۔ آگ اتنی شدید ہے کہ 32 ویں منزل کے آس پاس کی منزلوں تک پھیل گئی۔

جس عمارت میں آگ لگنے کا واقعہ پیش آیا وہ ورلی علاقہ کے ویر ساورکر مارگ پر موجود ہے۔ تاحال آگ لگنے کی وجوہات معلوم نہیں ہو پائی ہیں۔ عمارت کا نام بیومونڈ بتایا جا رہا ہے۔ یہ بھی بتایا جا رہا ہے کہ معروف اداکارہ دیپیکا پادوکون بھی اسی عمارت کے 26 ویں فلور پر رہتی ہیں۔

اطلاعات کے مطابق فائر بریگیڈ نے موقع پر پہنچ کر 90-95 افراد کو محفوظ نکال لیا ہے۔ موقع پر فائر بریگیڈ کے علاوہ کئی ایمبولینسیں بھی پہنچ گئی ہیں۔

واضح رہے کہ کچھ روز قبل ممبئی کے سندھیا ہاؤس میں آگ لگ گئی تھی۔ سندھیا ہاؤس کی تیسری اور چوتھی منزل پر آگ لگی تھی۔ اس عمارت میں انکم ٹیکس کا دفتر ہے۔ آگ لگنے کی وجہ سے 4-5 افراد عمارت میں پھنس گئے تھے جنہیں بعد میں محفوظ نکال لیا گیا تھا۔