بابا رام دیو کے خلاف ایف آئی آر درج

یوگ گرو بابا رام دیو کی مشکلیں بڑھ رہی ہیں ۔کورونا وائرس کی دوا بنانے کے یوگ گرو بابا رام دیو کے دعوے کو عوام کے ساتھ دھوکہ قرار دیتے ہوئے دہلی کے روہنی تھانہ میں ایف آئی آر درج کی گئی ہے۔

بابا کے خلاف یہ ایف آئی آر سماجی کارکن اور جن سنگھرش واہنی کے کنوینر بھوپندر سنگھ راوت کے ذریعہ درج کی گئی ہے۔ایف آئی آر میں کہا گیا ہے کہ اس دوا کو لانچ کرنے سے پہلے اس کا کلینکل ٹیسٹ نہیں کیا گیا ہے جو عوام کے ساتھ جعل سازی ،دھوکہ اور سازش ہے۔

مسٹر راوت نے یہاں جاری ایک بیان میں کہا کہ کووڈ19 کے قہر سے جب پوری دنیا پریشان ہے اور ایسے میں بابا وبا سے بچاؤ کے نام پر لوگوں کو دھوکہ دے کر صرف منافع کمانے کی کوشش کررہے ہیں۔ انہوں نے کہا کہ بابا رام دیو کی پتنجلی کمپنی نے نہ صرف دوا بنانے کا دعویٰ کیا ہے بلکہ دوا کی’کورونا کٹ‘ نام سے آن لائن مارکٹنگ بھی کی جارہی ہے۔

واضح رہے کہ آیوش کی وزارت نے پتنجلی آیوروید لمیٹیڈ سے کہا ہے کہ وہ جس اسپتال میں اس دوا سے متعلق تحقیق انجام دی گئی، پروٹوکول، سیمپل سائز، ادارہ جارتی اخلاقی کمیٹی سے منظوری، سی ٹی آر آئی رجسٹریشن اور تحقیق کے نتائج کا اعدادوشمار کی تفصیلات مہیا کرائے۔ وزارت نے کمپنی کو ہدایت دی کہ جب تک اس کے دعوے کی جانچ نہیں کرلی جاتی تب تک کمپنی اس دوا کی تشہیر پر روک لگا دے۔