بالآخر مرکزی وزیر قانون نے کانگریس لیڈر ششی تھرور سے مانگی معافی

مرکزی وزیر قانون روی شنکر پرساد نے تقریباً ایک سال قبل کانگریس رکن پارلیمنٹ ششی تھرور کو 'قتل کا ملزم' کہا تھا جس کے لیے انھوں نے تحریری طور پر بلاشرط معافی مانگی ہے۔ اس معافی نامہ کے بعد ششی تھرور نے بھی روی شنکر پرساد کے خلاف کیا گیا ہتک عزتی کا مقدمہ واپس لے لیا ہے۔ ششی تھرور نے روی شنکر پرساد کے ذریعہ تحریر کردہ معافی نامہ کی کاپی اپنے ٹوئٹر ہینڈل سے شیئر بھی کی ہے۔

ششی تھرور نے بی جے پی لیڈر روی شنکر پرساد کا معافی نامہ ٹوئٹر پر شیئر کرتے ہوئے لکھا ہے کہ "یہ اعلان کرتے ہوئے کافی خوشی ہو رہی ہے کہ روی شنکر پرساد کے ساتھ ہوئی ان کی نااتفاقی پر سمجھوتہ ہو گیا ہے۔" دراصل ایک سال قبل جب اپنے ایک بیان میں روی شنکر پرساد نے ششی تھرور کو قتل کا ملزم بتایا تھا تو ان پر کانگریس لیڈر نے ہتک عزتی کا مقدمہ کر دیا تھا۔ روی شنکر پرساد نے اپنے بیان پر معافی مانگتے ہوئے خط میں لکھا ہے کہ "ایک سال پہلے میں نے آپ کو قتل کا ملزم بتا دیا تھا۔ اب جانچ کے بعد میں اس نتیجہ پر پہنچا ہوں کہ جو میں نے کہا وہ دلائل کے لحاظ سے غلط ہے۔ میں اپنے الزام کو بلاشرط واپس لیتا ہوں۔"

بہر حال، اس معافی نامہ سے پہلے ترووننت پورم کی ایک عدالت نے ششی تھرور کے ذریعہ داخل ہتک عزتی معاملہ میں روی شنکر پرساد کو نوٹس جاری کر پیش ہونے کی ہدایت دی تھی۔ روی شنکر پرساد کو 2 مئی کو عدالت میں پیش ہونا تھا۔ نوٹس ملنے کے بعد روی شنکر پرساد نے ششی تھرور سے یہ تحریری معافی مانگی ہے اور اس کے ساتھ ہی ششی تھرور نے اپنا مقدمہ واپس لے لیا۔ گویا کہ دونوں کے درمیان پیدا تنازعہ اب ختم ہو گیا ہے۔