یوکرین اور اسرائیل کے علاقے میں جنگ کے سبب مدھیہ پردیش میں کھاد کی قلت! زرعی ترقیات کے وزیر کا بیان

مدھیہ پردیش کے کسان فلاح اور زرعی ترقیات کے وزیر ایدل سنگھ کنشانا نے ریاست میں ہو رہی کھاد کی قلت کے لیے یوکرین اور اسرائیل کے علاقے میں چل رہے جنگ کو ذمہ دار قرار دیا ہے۔ وزیر زراعت نے کسانوں کو نینو یوریا اور نینو ڈی اے پی کا استعمال کرنے کی بھی صلاح دی ہے۔

ایدل سنگھ کنشانا نے کہا کہ اس سال بین الاقوامی بازاروں میں ڈی اے پی کی قیمتوں میں بڑے پیمانے پر اتار چڑھاؤ کی وجہ یوکرین اور اسرائیل کا جنگ میں شامل ہونا ہے، جس کے سبب سپلائی میں پابندیوں کا سامنا کرنا پڑ رہا ہے۔ پھر بھی کسانوں کو وافر مقدار میں کھاد دستیاب کرانے کا منصوبہ تیار کیا گیا ہے۔

میڈیا سے بات کرتے ہوئے انہوں نے کہا کہ فصلوں کے لیے نائٹروجن، فاسفورس اور پوٹاش کی ضرورت ہوتی ہے۔ ڈی اے پی سے نائٹروجن اور فارسفورس کی سپلائی ہو پاتی ہے جبکہ این پی کے استعمال سے نائٹروجن، فاسفورس اور پوٹاش تینوں عناصر کی سپلائی ہو جاتی ہے۔ اس لیے کسانوں کو زرعی سائنسدانوں کے ذریعہ ڈی اے پی کے کی جگہ پر این پی کے کے استعمال کی صلاح دی جا رہی ہے۔

مرکزی حکومت نے ڈی اے پی کھاد پر سبسیڈی بڑھا دی ہے جس سے کہ کسانوں کو کسی طرح کے مسائل کا سامنا نہ کرنا پڑے۔ ایک بیگ یوریا کی قیمت 2 ہزار 265 روپے ہے جبکہ حکومت اسے سستی شرح پر کسانوں کو 266.50 روپے میں دستیاب کرا رہی ہے۔ اسی طرح ڈی اے پی کی ایک بیگ کی قیمت 2 ہزار 446 روپے ہے جبکہ حکومت اسے 1 ہزار 350 روپے فی بیگ میں دستیاب کراتی ہے۔

انہوں نے بتایا کہ ریاست میں کسانوں کو خریف کے موسم میں دی جانے والی سبسیڈی کا حساب کریں تو یہ یوریا کے لیے 7 ہزار 32 کروڑ روپے اور ڈی اے پی کے لیے 1 ہزار 258 کروڑ روپے ہوگی، یہ حکومت کی کسانوں کے تئیں سنجیدگی کو ظاہر کرتا ہے۔ انہوں نے بتایا کہ نینو یوریا اور نینو ڈی اے پی بھی کسانوں کو استعمال کرنے کی صلاح دی گئی ہے۔ پھول آنے سے پہلے اسپرے کرنے سے پیداوار میں اضافہ ہوتا ہے۔

وزیر کنشانا نے مزید کہا کہ ریاستی حکومت یہ یقینی کرے گی کہ دیے گئے کھاد اچھی قسم کے ہوں، جہاں بھی خراب قسم کے کھاد، بیج اور جراثیم کش فروختگی کی اطلاع ملے گی، ان کے خلاف سخت کارروائی کی جائے گی۔ کالا بازاری اور نقلی کھادوں کے معاملے میں ہم قانونی کارروائی بھی کریں گے اور قصورواروں کے خلاف ایف آئی آر درج کریں گے۔