دہلی میں کورونا کی چوتھی لہر کا خدشہ، ماسک نہیں لگانے پر عائد ہوگا 500 روپے جرمانہ

نئی دہلی: قومی راجدھانی دہلی میں کورونا کے معاملات میں اضافے کے ساتھ ہی پابندیوں کا سلسلہ دوبارہ شروع ہو گیا ہے۔ دہلی حکومت نے ایک بار پھر فوری اثر سے عوامی مقامات پر ماسک پہننے کو لازمی قرار دیا ہے۔ اب دہلی میں ماسک نہ پہننے پر 500 روپے کا جرمانہ عائد کیا جائے گا۔ خیال رہے کہ کہ گزشتہ کچھ دنوں سے دہلی میں کورونا کے معاملات میں اضافہ ہو رہا ہے۔

دہلی حکومت کی جانب سے ماسک نہ پہننے کے حوالہ سے جرمانہ عائد کرنے کا جو نوٹیفکیشن جاری کیا گیا ہے وہ نجی فور وہیلر گاڑی میں بیٹھے لوگوں پر نافذ العمل نہیں ہوگا۔

محکمہ صحت کے اعداد و شمار کے مطابق راجدھانی دہلی میں کورونا کیسز کے ساتھ اموات کی تعداد بھی بڑھ رہی ہے اور اگست میں کورونا کی وجہ سے دہلی میں اب تک 40 لوگوں کی موت ہو چکی ہے۔ جبکہ جولائی کے آخری 10 دنوں میں 14 افراد کورونا وائرس سے ہلاک ہوئے تھے، یعنی اس وبا سے ہونے والی اموات کی تعداد میں تقریباً تین گنا اضافہ ہوا ہے۔