دہلی میں پولیس کے بجائے شرپسندوں کا خوف: ڈاکٹر نریش کمار

نئی دہلی. ملک کی راجدھانی دہلی میں دوہرے قتل کے پیش نظر کانگریس کے سینئر ترجمان ڈاکٹر نریش کمار نے حکومت ہند کے وزیر داخلہ کو میمورنڈم دیتے ہوئے اس واقعہ کا نوٹس لیتے ہوئے ان سے وقت نکالنے کا مطالبہ کیا۔ ڈاکٹر نریش نے کہا کہ دہلی میں جہاں پولس کا خوف ہونا چاہئے وہاں شرپسندوں کا خوف ہے۔

انہوں نے یہ بھی کہا کہ یہ درست ہے کہ پنجاب کے وزیر اعلی بھگونت مان اور دہلی کے وزیر اعلی اروند کیجریوال کے پاس وقت نہیں ہے، لیکن ملک کے وزیر داخلہ کے پاس دہلی کے لیے کب وقت ہوگا، جس میں آئے روز جرائم ہو رہے ہیں اور یہ رک نہیں رہے ہیں۔ اس واقعہ کے پیش نظر دہلی کانگریس پارٹی کے کارکنان امن و امان کو لے کر جلد ہی دھرنا و احتجاج کرے گی۔

ڈاکٹر نریش کمار نے کہا کہ دہلی میں قتل کے بڑھتے ہوئے واقعات کو دیکھتے ہوئے جلد از جلد ایک آل پارٹی میٹنگ بلائی جانی چاہئے تاکہ پولیس بھرتی میں جو خلا ہے اس پر بات کی جاسکے۔ وہیں دہلی میں قانون کا اقبال بلند ہونے کی بجائے شرپسندوں کا اقبال بلند ہو گیا ہے۔ جس کا خاتمہ ضروری ہو گیا ہے۔

انہوں نے الزام لگایا کہ دہلی کے وزیر اعلیٰ اور لیفٹیننٹ گورنر آپس میں لڑتے رہتے ہیں اور ان کا اس طرح کے معاملات سے کوئی لینا دینا نہیں ہے۔ انہوں نے یہ سوال بھی اٹھایا کہ چیف منسٹر لیفٹیننٹ گورنر کے ساتھ میٹنگ میں شرکت کیوں نہیں کرتے۔ وہ صرف بیان دینا جانتے ہیں۔ وزیر اعلیٰ نے دہلی کے لیے کچھ نہیں کیا۔ وہیں دہلی پولیس کمشنر راجدھانی دہلی کے نظام کو چست رکھنے کے لیے ایک تھانہ کمیٹی تشکیل دیں تاکہ ایسے واقعات کے رونما ہونے سے پہلے ہی کارروائی کی جا سکے۔ اس کے علاوہ پولیس گشت بڑھانے کے ساتھ ساتھ کم از کم 500 پی سی آر وینوں میں مزید اضافہ کیا جائے۔