ہنومان چالیسا پڑھیں، فصلوں کو آفت سے بچائیں۔ بی جے پی رہنما

نئی دہلی : وزیر اعظم نریندر مودی کی حکومت جب سے برسراقتدار آئی ہے تب سے آر ایس ایس اور بی جے پی سے وابستہ رہنماؤں اور کارکنوں نے سائنس اور مذہب میں ایسی ملاوٹ کی ہے کہ ہر دانشمند شخص اپنا سر دھننے پر مجبور ہو گیا ہے۔

ایک طرف وزیر اعظم کسانوں کو فصل بیمہ منصوبہ کے فوائد گناتے نہیں تھکتے اور دوسری طرف بی جے پی رہنما کسانوں کو بیوقوفانہ مشورے دے رہے ہیں۔ بی جے پی کے سابق رکن اسمبلی اور رہنما رمیش سکسینہ نے کسانوں سے کہا کہ فصلوں کو قدرتی آفات سے محفوظ رکھنا ہے تو ہنومان کی پوجا کریں۔ حیرت ناک بات یہ ہے کہ ان کے اس بیان کی وزیر زراعت نے بھی تائید کی ہے!

رمیش سکسینہ نے کہا ’’سائنسدانوں نے بتایا ہے کہ اگلے 4-5 دن تک قدرتی آفت بنی رہیں گی، اولے بھی گریں گے اور بارش بھی ہوگی۔ اس آفت سے بچنے کا واحد اقدام یہ ہے کہ وہ ہنومان چالیسا کاپاٹھ کریں۔‘‘ سکسینہ نے مزید کہا کہ کسان بھائیوں سے یہ گزارش ہے کہ وہ ہر دن ایک گھنٹہ ہنومان چالیسا کا پاٹھ کریں۔

خبر رساں ایجنسی پی ٹی آئی کے مطابق صوبہ مدھیہ پردیش کے وزیر مملکت برائے زراعت بال کرشن پاٹیدار نے بھی بی جے پی رہنما رمیش سکسینہ کے بیان کی حمایت کی ہے۔ پاٹیدار نے کہا کہ ’’ہنومان چالیسا کا پاٹھ کرنے سے کسان اندر سے مضبوط ہوں گے۔‘‘

واضح مدھیہ پردیش کے سہور میں پچھلے کئی دنوں سے بارش اور اولے گرنے سے کسانوں کو شدید نقصان ہوا ہے اور گیہوں اور چنے کی فصلیں تباہ ہو گئی ہیں۔ لیکن بی جےپی رہنما جس طرح کے بیانات دے رہے ہیں ان سے سوائےکسانوں کے زخموں پر نمک پاشی کے علاوہ اور کچھ نہیں۔