کسان تحریک: سکھ سنت کی خودکشی کے بعد غم و غصہ کی لہر

نئی دہلی: دہلی کے کنڈلی بارڈر پر زرعی قوانین کے خلاف چل رہی کسان تحریک میں شامل سکھ سنت رام سنگھ نے گزشتہ روز خود کشی کر لی۔ اس واقعہ پر لوگوں میں غم و غصہ کی لہر پائی جا رہی ہے۔ کانگریس کے ترجمان رندیپ سنگھ سرجےوالا نے افسوس کا اظہار کرتے ہوئے مودی حکومت پر حملہ بولا اور کہا، ’’مودی حکومت کی ضد خود کش ہے کیونکہ یہ ملک کے اناج پیدا کرنے والوں کی جان کی دشمن بن گئی ہے۔

کانگریس لیڈر راہل گاندھی نے کہا کہ کرنال کے سنت بابا رام سنگھ جی نے کنڈلی بارڈر پر کسانوں کی بدحالی کو دیکھ کر خود کشی کر لی۔ غم کے ان لمحات میں میری تعزیت اور خراج عقیدت۔ کئی کسان اپنی قربانی پیش کر چکے ہیں۔ مودی حکومت ظلم کی حدود کو عبور کر چکی ہے۔ ضد چھوڑ کر فوری طور پر زرعی قوانین واپس لئے جائیں۔

شرومنی اکالی دل کے سربراہ سکھبیر سنگھ بادل نے ٹوئٹر پر کہا ، ’’یہ سن کر دکھ ہوا کہ سنت بابا رام سنگھ جی نانکسر سنگڑا والے نے کسانوں کی تکلیف کو دیکھ کر سنگھو بارڈر پر خود کو گولی مار لی۔ سنت جی کی قربانی رائیگاں نہیں جاے گی۔ میں مرکزی حکومت سے گزارش کرتا ہوں کہ صورتحال کو مزید بگڑنے نہ دیں اور تینوں زرعی قواین کو منسوخ کریں۔

شرومنی اکالی دل کی لیڈر ہرسمرت کور بادل نے ٹوئٹ کیا، ’’مرکزی حکومت یہاں تک ضدی بنی ہوئی ہے کہ کسانوں کی تکلیف کی تردید کر رہی ہے۔ بابا رام سنگھ جی سنگڑا والے نے کنڈلی سرحد پر اپنے ارد گرد جمع لوگوں کی تکلیف کو دیکھ کر خود کشی کر لی۔ امید ہے کہ مرکزی حکومت اس سانحہ کے بعد بیدار ہوگی اور اس سے پہلے کی بہت دیر ہو جائے، تینوں زرعی قوانین کو واپس لیگی۔‘‘

خیال رہے کہ سکھ گرنتھی رام سنگھ سنگڑا والے نے گزشتہ روزسنگھو بارڈر پر زرعی قونین کے خلاف خود کشی کی اور ایک سوسائڈ نوٹ بھی چھوڑا ہے۔ نوٹ میں کسان تحریک کے تئیں مرکزی حکومت کی عدم دلچسپی کا ذکر کیا گیا ہے۔