کسانوں نے آوارہ مویشیوں کا ریوڑ ریلوے ٹریک پر کھدیڑا، 11 گائیں ہلاک، متعدد زخمی

لکھنؤ: اتر پردیش کے سنبھل ضلع میں آوارہ مویشیوں سے پریشان کسانوں نے انتہائی غیرمعمولی قدم اٹھاتے ہوئے آوارہ مویشیوں کے ایک ریوڑ کو ریلوے ٹریک پر کھدیڑ دیا۔ رپورٹ کے مطابق سنبھل کے بہجوئی قصبہ میں دو درجن آوارہ جانوروں کا ریوڑ ریلوے ٹریک پر دوڑ رہا تھا۔ اسی دوران وہاں سے دہرادون ایکسپریس گزرنے لگی، جس کی زد میں آ کر 11 افراد ہلاک ہو گئے۔ اس کے ساتھ ہی کئی گائیں شدید زخمی ہو گئیں۔

گائیوں کے ریوڑ سے ٹکرانے کے بعد ٹرین کو روک دیا گیا ور ایک گھنٹہ بعد اسے آگے کے لئے روانہ کیا جا سکا۔ مقامی لوگوں نے بتایا کہ یہاں کی گائیں علی گڑھ-مراد آباد ریلوے ٹریک کے قریب کھیتوں میں کھڑی فصلوں کو تباہ کر رہی ہیں۔ کسانوں نے غالباً ناراض ہو کر ان گائیوں کو ریلوے ٹریک کی طرف کھدیڑا ہوگا۔

یہاں کا رہائشی علاقہ ریلوے کی پٹریوں سے صرف 500 میٹر کے فاصلے پر ہے۔ علاقے کے کسانوں نے آوارہ مویشیوں کے بارے میں متعدد بار انتظامیہ سے شکایت کی ہے۔ بتایا جا رہا ہے کہ آوارہ مویشی پناہ نہ ہونے کی وجہ سے باہر گھوم رہے ہیں اور اکثر کسانوں کے کھیتوں میں گھس جاتے ہیں۔ اجے پرجاپتی نامی ایک شخص جو خود کو گائے کا محافظ بتاتا ہے، نے بتایا کہ گزشتہ دو ماہ میں اس علاقے میں اس طرح کے 12 سے زیادہ واقعات رونما ہو چکے ہیں۔

ایس ڈی ایم رام کیش دھاما نے کہا کہ اس گاؤں کے قریب پندرہ دن میں یہ اس نوعت کا تیسرا واقعہ ہے۔ انہوں نے کہا کہ پولیس سے یہ معلوم کرنے کو کہا گیا ہے کہ آیا یہ ایک حادثہ تھا یا کوئی جان بوجھ کر مویشیوں کو مار رہا ہے۔ ایس ڈی ایم نے کہا کہ اگر کوئی قصوروار پایا گیا تو سخت کارروائی کی جائے گی۔ انہوں نے کہا ’’ہم اس سیکشن میں ٹرینوں کی رفتار کی حد کو چیک کرنے اور اس طرح کے واقعات کو روکنے کے لیے دیگر ضروری اقدامات کرنے کے لیے ریلوے کو خط لکھیں گے۔‘‘