اتر پردیش: امیٹھی میں اے ٹی ایم سے نکل رہے 200-200 روپے کے نقلی نوٹ، لوگ پریشان، پولیس تحقیقات شروع

اتر پردیش میں نقلی نوٹ کا ایک حیرت انگیز معاملہ سامنے آیا ہے جو موضوعِ بحث بنا ہوا ہے۔ معاملہ امیٹھی ضلع کا ہے جہاں ایک اے ٹی ایم سے کئی لوگوں کو 200-200 روپے کے نقلی نوٹ ملے ہیں۔ میڈیا رپورٹس کے مطابق جب لوگ اے ٹی ایم سے نقد نکالنے پہنچے تو یہ دیکھ کر ان کے ہوش اڑ گئے کہ جو 200-200 کے نوٹ انھیں اے ٹی ایم نے دیئے ہیں، وہ سبھی نقلی ہیں۔

اے ٹی ایم سے نقلی نوٹ نکلنے کے واقعہ کی ویڈیو بھی تیزی کے ساتھ سوشل میڈیا پلیٹ فارمس پر وائرل ہو رہی ہے۔ بتایا جاتا ہے کہ امیٹھی کے منشی گنج روڈ، سبزی منڈی کے پاس انڈیا وَن اے ٹی ایم کی یہ ویڈیو ہے جس میں اے ٹی ایم سے نکلا 200 روپے کا نقلی نوٹ پہلی نظر میں اصلی نوٹ کی طرح ہی نظر آتا ہے۔ لیکن جب اسے دھیان سے دیکھا جاتا ہے تو اس میں کئی ساری خامیاں دکھائی دیتی ہیں۔ ان نقلی نوٹوں کی سب سے خاص بات یہ ہے کہ ان پر ’چلڈرن بینک آف انڈیا‘ اور ’فل آف فن‘ جیسی لائنیں لکھی ہوئی ہیں۔ کئی لوگوں کو 200 روپے کے یہ نقلی نوٹ اے ٹی ایم سے ملے ہیں۔ جس کے بعد لوگوں میں حیرانی پیدا ہوئی اور اس کی شکایت پولیس تک پہنچائی گئی۔

اے ٹی ایم مشین سے نقلی نوٹ برآمد ہونے کے بعد کچھ لوگوں نے سوشل میڈیا پر تصویر اور ویڈیو وائرل کر کے بینک کے خلاف ناراضگی ظاہر کی ہے۔ لوگوں کو اے ٹی ایم سے نقلی نوٹ ملنے کی خبر چاروں طرف تیزی سے پھیل گئی۔ مقامی لوگوں نے اے ٹی ایم کے خلاف تحریک شروع کر دی اور وہاں زبردست بھیڑ جمع ہو گئی۔ نقلی نوٹ نکلنے کی خبر ملنے کے بعد یوپی پولیس نے جانچ شروع کر دی ہے۔