ہریانہ میں ٹرین کے اندر دھماکہ، 4 مسافر کودنے سے زخمی، 4 آگ میں جھلسے

ہریانہ میں ایک ٹرین کے اندر دھماکہ اور آگ پھیلنے کا خوفناک معاملہ سامنے آیا ہے۔ موصولہ اطلاع کے مطابق روہتک سے چل کر بہادر گڑھ کی طرف جا رہی ٹرین میں یہ دھماکہ ہوا ہے۔ اس حادثہ کی وجہ ٹرین میں لے جائے جا رہے پٹاخہ کے سامان (گندھک اور پوٹاش وغیرہ) کو قرار دیا جا رہا ہے۔ دھماکہ کے بعد بوگی میں آگ لگنے سے کچھ مسافر چلتی ٹرین سے کود گئے، جن میں 4 زخمی بتائے جا رہے ہیں۔ 4 دیگر مسافر آگ میں جھلسنے سے زخمی ہوئے ہیں جنھیں علاج کے لیے اسپتال میں داخل کرایا گیا ہے۔

کچھ میڈیا رپورٹس میں بتایا جا رہا ہے کہ حادثہ سانپلا اسٹیشن کے پاس کا ہے۔ حادثہ کی خبر ملتے ہی جی آر پی اور آر پی ایف کی ٹیمیں موقع پر پہنچ گئیں اور جانچ بھی شروع ہو گئی۔ فائر بریگیڈ کا عملہ بھی فوراً جائے وقوع پر پہنچا اور تقریباً ڈیڑھ گھنٹے کی جدوجہد کے بعد آگ پر قابو پایا جا سکا۔

پولیس کے حوالے سے ایک میڈیا رپورٹ میں بتایا گیا ہے کہ روہتک اسٹیشن سے یہ ٹرین شام 4.20 بجے چلی تھی۔ جیسے ٹرین سانپلا اسٹیشن سے نکلی، اچانک سے دھماکہ ہوا اور بوگی میں آگ لگ گئی۔ پولیس کا کہنا ہے کہ اس ٹرین میں کوئی شخص دیوالی پر فروخت کرنے کے لیے گندھک-پوٹاش لے کر جا رہا تھا۔ یہ دھماکہ خیز مادہ سیٹ کے اوپر بنے رینک پر رکھا ہوا تھا۔ کچھ لوگوں کا کہنا ہے کہ شارٹ سرکٹ کی وجہ سے آگ پٹاخوں تک پہنچی اور پھر دھماکہ ہو گیا۔

اس دھماکہ کے بعد مسافروں میں بھگدڑ سی مچ گئی۔ 4 مسافروں نے چلتی ٹرین سے باہر چھلانگ لگا دی اور دیگر 4 بری طرح سے جھلس گئے۔ جی آر پی نے ان سبھی کو اسپتال میں داخل کرا دیا ہے۔ اس حادثہ کے بعد غنیمت یہ رہی کہ ہنگامہ کی آواز سن کر لوکو پائلٹ نے فوراً ٹرین روک دی۔ ٹرین رکتے ہی کچھ مسافر اپنا سامان لے کر تو کچھ بغیر سامان لیے ہی متاثرہ بوگی سے اتر گئے۔