سی اے اے سے مسلمانوں کو باہر رکھنا سیکولرزم کے خلاف: مولانا رابع ندوی

لکھنؤ: آل انڈیا مسلم پرسنل لاء بورڈ (اے آئی ایم پی ایل بی) کے صدر اور دارالعلوم ندوۃ العلماء کے ناظم مولانا رابع حسنی ندوی نے حکومت سے مطالبہ کیا ہے کہ وہ شہریت ترمیمی قانون (سی اے اے) واپس لے یا پھر اس میں مسلمانوں کو بھی شامل کیا جائے۔

خبررساں ایجنسی اے آئی این ایس کے مطابق مولانا رابع حسنی نے کہا، ’’سی اے اے ملک کے حق میں مناسب نہیں ہے۔ اس قانون سے ملک میں انتشار پھیل گیا ہے۔ اس قانون کے تحت دی جانے والی سہولت سے مسلمانوں کو باہر رکھنا سیکولرزم کو نقصان پہنچا رہا ہے۔‘‘

مولانا رابع حسنی نے مزید کہا کہ ’’سی اے اے سے ہمارے ملک کی ساکھ بھی دنیا بھر میں متاثر ہو رہی ہے۔ ہماری جمہوریت میں ہر شخص کو احتجاج کرنے کا اختیار ہے لیکن لوگوں کو پرتشدد اور اشتعال انگیز سرگرمیوں سے دور رہنا چاہیے۔‘‘

واضح رہے کہ 16 دسمبر کو لکھنؤ کے 121 سالہ قدیمی دار العلوم ندوۃ العلماء کے طلباء نے دہلی کے جامعہ ملیہ اسلامیہ (جے ایم آئی) اور علی گڑھ مسلم یونیورسٹی (اے ایم یو) طلباء کے خلاف پولیس کی جابرانہ کارروائی اور سی اے اے کے خلاف مظاہرہ کیا تھا۔

طلباء اپنے ہاسٹل سے نکل کر احتجاج کر رہے تھے جنہیں گیٹ پر پولیس نے روک لیا تھا۔ روکے جانے کے بعد طلباء مشتعل ہو گئے تھے اور موقع پر پتھر بھی پھینکے جانے لگے۔ اس کے بعد پولیس نے طلبہ پر لاٹھی چارج کر دیا تھا۔ ندوہ کے طلباء کو گیٹ پر روکنے کی کوشش کرتی پولیس کی تصویر بین الاقوامی سطح پر کافی وائرل ہوئی تھی اور امریکہ سمیت دنیا کے متعدد بڑے اخباروں نے اس تصویر کو اپنے صفحہ اور پر جگہ دی تھی۔