مہاراشٹر کے سابق وزیر انیل دیشمکھ کی درخواست ضمانت بامبے ہائی کورٹ سے منظور، ای ڈی کا سپریم کورٹ سے رجوع

ممبئی: مہاراشٹر کے سابق وزیر داخلہ انیل دیشمکھ کی درخواست ضمانت منگل کے روز بامبے ہائی کورٹ سے منظور ہو گئی ہے، تاہم ای ڈی نے اس کے خلاف سپریم کوڑت سے رجوع کیا۔ بامبے ہائی کورٹ نے بعد میں ای ڈی کی طرف سے مطلع کئے جانے کے بعد اپنے فیصلہ پر 13 اکتوبر کر حکم امتناعی جاری کر دیا۔

قبل ازیں، بامبے ہائی کورٹ کی جانب سے انیل دیشمکھ کو ایک لاکھ روپے کے مچلکہ پر پابند کرتے ہوئے ضمانت دینے کا فیصلہ کیا گیا۔ انیل دیشمکھ نے مبینہ 100 کروڑ کے گھوٹالہ معاملے میں ضمانت کی درخواست پیش کی تھی۔ سپریم کورٹ کے حکم کے بعد دیشمکھ کی درخواست ضمانت پر بامبے ہائی کورٹ نے گزشتہ ہفتے سماعت کی تھی۔ فریقین کے دلائل سننے کے بعد منگل کے روز عدالت نے اپنا فیصلہ سنایا۔

انیل دیشمکھ ای ڈی کے ذریعہ درج کیس میں ضمانت ملنے کے بعد بھی رہا نہیں ہو پاتے اور انہیں سی بی آئی کے ذریعہ درج کیس کے سلسلے میں حراست میں رہنا پڑتا۔ انیل دیشمکھ کو گزشتہ سال نومبر میں گرفتار کیا گیا تھا اور رواں سال کے اوائل میں پی ایم ایل اے کی خصوصی عدالت کی جانب سے ان کی ضمانت کی درخواست مسترد ہونے کے بعد انہوں نے بامبے ہائی کورٹ سے رجوع کیا تھا۔

انہیں ہائی کورٹ سے کوئی راحت نہیں ملی اور تقریباً 8 ماہ سے بامبے ہائی کورٹ میں ان کی ضمانت کی درخواست زیر التوا تھی۔ اس کے بعد 26 ستمبر کو سپریم کورٹ میں انیل دیشمکھ کی ضمانت کے معاملے پر بھی سماعت ہوئی۔ سپریم کورٹ نے بامبے ہائی کورٹ کی جانب سے درخواست ضمانت کو زیر التوا میں رکھنے پر ناراضگی ظاہر کی تھی۔

سپریم کورٹ نے بامبے ہائی کورٹ سے کہا تھا کہ وہ ایک ہفتہ کے اندر انیل دیشمکھ کی ضمانت کی عرضی پر سماعت کرے اور اس پر جلد فیصلہ کرے۔ جس کے بعد بامبے ہائی کورٹ نے انیل دیشمکھ کی درخواست ضمانت پر سماعت کی اور آج ان کی درخواست ضمانت منظور کر لی گئی۔

انیل دیشمکھ پر الزام ہے کہ مہاراشٹر کے وزیر داخلہ کی حیثیت سے انہوں نے ذاتی فائدے کے لیے عہدے کا غلط استعمال کیا۔ ای ڈی نے مبینہ طور پر 4.7 کروڑ روپے کی غیر قانونی رشوت ستانی اور ممبئی کے تاجروں سے رقم وصول کرنے کا معاملہ درج کیا تھا۔ دیشمکھ کے خلاف پہلے سی بی آئی نے معاملہ درج کیا اور اس کے بعد ای ڈی نے منی لانڈرنگ کے زاویے سے جانچ کی۔