ہریانہ میں اسمبلی انتخابات کے بعد بی جے پی کی ناقص حکمرانی کا خاتمہ یقینی: رندیپ سرجے والا

کرنال (ہریانہ): کانگریس کے رکن پارلیمنٹ رندیپ سنگھ سرجے والا نے منگل کے روز دعویٰ کیا کہ ہریانہ میں یکم اکتوبر کو ہونے والے اسمبلی انتخابات کے بعد بی جے پی کی ناقص حکمرانی ختم ہو جائے گی۔ انہوں نے کہا کہ ’ووٹ کی چوٹ‘ کی وجہ سے یکم اکتوبر کو ریاستی حکومت تبدیل ہونے جا رہی ہے۔

سرجے والا نے کہا، ’’اس بار بی جے پی کو اسمبلی سیٹوں میں سنگل ڈیجٹ سیٹیں ملیں گی۔ ہریانہ کے عام لوگ، کسان، مزدور، خواتین اور نوجوان پریشان ہیں۔ اس بار عوام نے تبدیلی کے لیے اپنا ذہن بنا لیا ہے۔ کانگریس کی سندیش یاترا بی جے پی حکمرانی کے لیے تابوت کی آخری کیل ثابت ہوگی۔‘‘

کرنال میں وزیر اعلیٰ نائب سنگھ سینی اور مرکزی وزیر منوہر لال کے رونے والے پوسٹر لگانے کے بارے میں پوچھے جانے پر سرجے والا نے کہا کہ کسی بھی لیڈر کے بارے میں کچھ بھی منفی یا غلط کہنا مناسب نہیں ہے۔ انہوں نے کہا، ’’جن لوگوں نے پوسٹر لگائے ہیں وہ کانگریس کے لوگ نہیں ہیں۔ بی جے پی خود ہی اس طرح کی سازش کرتی ہے، وہ خود پر کالک پھنکوا کر روتے ہیں۔ ہم دونوں کے کردار اور چہرے میں یہی فرق ہے۔‘‘

انہوں نے مزید کہا کہ کانگریس چاہتی ہے کہ کانگریس کی حکومت کسی جھوٹ پر نہیں بلکہ مثبت ایجنڈے پر قائم ہو۔ ٹکٹوں کی تقسیم کا فیصلہ کانگریس ورکنگ کمیٹی اور الیکشن کمیٹی کرے گی۔ ان کے الیکشن لڑنے کے سوال پر سرجے والا نے کہا کہ اس کا فیصلہ پارٹی کرے گی۔

یاد رہے کہ ہریانہ میں نئی ​​حکومت کی تشکیل کے لیے تمام 90 سیٹوں کے لیے یکم اکتوبر کو ایک ہی مرحلے میں ووٹنگ ہوگی۔ انتخابی نتائج کا اعلان 4 اکتوبر کو کیا جائے گا۔ انتخابات کا نوٹیفکیشن 5 ستمبر کو جاری کیا جائے گا۔ کاغذات نامزدگی داخل کرنے کی آخری تاریخ 12 ستمبر ہے اور جانچ پڑتال کی آخری تاریخ 13 ستمبر ہے۔ ساتھ ہی کاغذات نامزدگی واپس لینے کی آخری تاریخ 16 ستمبر تک ہوگی۔

ہریانہ اسمبلی میں 90 سیٹیں ہیں جن میں سے 17 شیڈول کاسٹ (ایس سی) کے لیے مختص ہیں۔ رپورٹ کے مطابق اس بار انتخابات میں 10321 صد سالہ ووٹرز جمہوری عمل کا حصہ ہوں گے۔