نائب صدر کا انتخاب 6 اگست کو ہوگا، نوٹیفکیشن جاری

نئی دہلی: الیکشن کمیشن نے آج یہاں نائب صدر کے انتخاب کے شیڈول کا اعلان کیا۔ شیڈول کے مطابق نائب صدر کے انتخاب کا نوٹیفکیشن 5 جولائی کو جاری کیا جائے گا جس کے بعد کاغذات نامزدگی شروع ہوں گے اور نامزدگی کی آخری تاریخ 19 جولائی ہوگی۔ امیدوار خود یا ان کے تجویز کنندگان اور حمایتی کسی بھی کام کے دن صبح 11 بجے سے سہ پہر 3 بجے تک کاغذات نامزدگی داخل کر سکتے ہیں۔ کاغذات نامزدگی کی جانچ پڑتال 20 جولائی کو ہو گی اور 22 جولائی تک نام واپس لیے جا سکیں گے۔

ضرورت پڑنے پر پولنگ 6 اگست بروز ہفتہ صبح 10 بجے سے شام 5 بجے تک ہوگی اور اسی دن پولنگ ختم ہونے کے بعد ووٹوں کی گنتی ہوگی۔ ووٹنگ پارلیمنٹ ہاؤس کمپلیکس میں ہوگی۔ پولنگ کے مقام پر کووڈ پروٹوکول کی تعمیل کو یقینی بنایا جائے گا۔ نائب صدر کے انتخاب میں راجیہ سبھا کے 233 منتخب اور 12 نامزد اراکین اور لوک سبھا کے 543 منتخب اراکین ووٹنگ میں حصہ لیں گے۔ اس طرح کل 788 ایم پی ہوں گے۔

اس مرتبہ لوک سبھا کے جنرل سکریٹری اُتپل کمار سنگھ نائب صدر کے انتخاب میں چیف الیکٹورل آفیسر ہوں گے۔ ان کی معاونت کے لیے اسسٹنٹ ریٹرننگ افسران بھی تعینات کیے جائیں گے۔ الیکشن میں ممبران کو بیلٹ پیپر پر کمیشن کی طرف سے فراہم کردہ خصوصی قلم سے رومن رسم الخط میں ترجیح درج کرنی ہوگی۔ امیدواروں کو 15,000 روپے بطور ضمانت جمع کروانے ہوں گے۔