شاہین باغ فائرنگ کے ملزم کو عآپ رکن بتانے والے پولس ڈپٹی کمشنر انتخابات سے برطرف

شاہین باغ فائرنگ کے ملزم کپل گوجر کے موبائل سے حاصل تصویر اور اس کے عآپ سے جڑے ہونے کا انکشاف کرنا دہلی پولس ڈپٹی کمشنر راجیش دیو کے لیے مہنگا ثابت ہو گیا ہے۔ الیکشن کمیشن نے راجیش دیو کے طرزعمل پر ناراضگی کا اظہار کیا ہے اور انہیں دہلی کے انتخابات سے متعلق کام کاج سے برطرف کر دیا ہے۔ الیکشن کمیشن نے بدھ کے روز دہلی کے پولس کمشنر کو حکم دیا ہے کہ ڈپٹی کمشنر راجیش دیو کے بارے میں شکایت ان کےسروس ریکارڈ (سی آر) میں بھی درج کی جائے۔

دہلی اسمبلی انتخابات سے ٹھیک پہلے کرائم برانچ میں تعینات راجیش دیو کی غیر ذمہ داری سے ناراض الیکشن کمیشن نے پولس کمشنر کے بارے میں کارروائی کی اطلاع جمعرات (6 فروری) کی شام 6 بجے تک کمیشن کو دینے کی ہدایت دی ہے اور ساتھ ہی کہا ہے کہ انھیں کس بھی طرح کی انتخابی ڈیوٹی پر نہ لگایا جائے۔ اس سلسلے میں الیکشن کمیشن نے باضابطہ نوٹس جاری کیا ہے۔

قابل ذکر ہے کہ عآپ نے راجیش دیو کے خلاف الیکشن کمیشن میں شکایت کی تھی اور کہا تھا کہ الیکشن سے ٹھیک پہلے بغیر کچھ ثابت ہوئے کسی بھی سیاسی پارٹی کا نام آخر کس طرح لیا جا سکتا ہے۔ ساتھ ہی عآپ لیڈر سنجے سنگھ نے میڈیا سے بات کرتے ہوئے یہ بھی کہا تھا کہ کسی قصوروار شخص کے ساتھ عآپ کا کوئی لیڈر تصویر کھنچواتا ہے تو اس کا مطلب یہ نہیں کہ وہ لیڈر بھی قصوروار ہو گیا۔ اگر ایسا ہے تو بی جے پی کے کئی سرکردہ لیڈروں کی تصویریں ملزموں اور مجرموں کے ساتھ موجود ہیں، تو کیا انھیں بھی ملزم اور مجرم مان لیا جائے۔