'20 مئی کو شندے کو وزیراعلیٰ کے عہدے کی پیشکش کی گئی تھی' آدتیہ ٹھاکرے کا بڑا انکشاف

مہاراشٹر میں جاری سیاسی ہلچل کے درمیان شیوسینا باغی ارکان اسمبلی پر سخت نظر آ رہی ہے۔ آدتیہ ٹھاکرے نے اپنے ایک بیان میں شندے کو نشانہ بناتے ہوئے کہا، '20 مئی کو وزیر اعلیٰ ادھو ٹھاکرے نے ایکناتھ شندے کو وزیر اعلی کا عہدہ سونپنے کی پیشکش کی تھی، اس وقت ایکناتھ شندے نے اس پیشکش کو ٹھکرا دیا تھا۔ لیکن ٹھیک ایک ماہ بعد 20 جون کو وہ کئی ارکان اسمبلی کے ساتھ سورت پہنچے۔ آدتیہ ٹھاکرے نے شیوسینکوں کو مخاطب کرتے ہوئے کہا کہ وہ اندازہ لگا سکتے ہیں کہ یہ منصوبہ بندی کب سے چل رہی تھی ۔

آپ کو بتاتے چلیں کہ آدتیہ ٹھاکرے مسلسل باغی ارکان اسمبلی پر حملے کر رہے ہیں۔ اس سے پہلے انہوں نے کہا تھا کہ شیوسینا کے دروازے ان لوگوں کے لیے کھلے ہیں جو پارٹی چھوڑنا چاہتے ہیں یا واپس آنا چاہتے ہیں۔ لیکن جو غدار ارکان اسمبلی ہیں ان کے لئے پارٹی کے دروازے بند ہیں۔

جنوبی ممبئی میں یووا سینا کی طرف سے منعقدہ پارٹی کارکنان کی ایک ریلی میں آدتیہ ٹھاکرے نے کہا کہ بغاوت کرنے والے ایم ایل اے کبھی ہمارے نہیں تھے… پارٹی کی گڑبڑ ختم ہو چکی ہے، اب جو ہونا ہے وہ اچھے کے لیے ہی ہوگا۔انہوں نے کہا کہ یہ بغاوت اپوزیشن پارٹی (بی جے پی) کی وجہ سے نہیں ہو رہی ہے بلکہ ہمارے ہی لوگوں نے ہمیں دھوکہ دیا ہے۔