100 کروڑ روپے کے منی لانڈرنگ کیس میں ای ڈی نے پرکاش راج کو کیا طلب

مرکزی جانچ ایجنسی ای ڈی (انفورسمنٹ ڈائریکٹوریٹ) نے ’پرنو جویلرس‘ گولڈ پونجی اسکیم گھوٹالہ معاملے میں مشہور اداکار پرکاش راج کو پوچھ تاچھ کے لیے سمن بھیجا ہے۔ دراصل ای ڈی اسی گولڈ اسکیم گھوٹالہ میں پی ایم ایل اے کے تحت تفتیش کر رہی ہے۔ اس گولڈ پونجی اسکیم کے تحت تقریباً 100 کروڑ روپے کی دھوکہ دہی کو انجام دیا گیا ہے۔ اداکار پرکاش راج پرنو جویلرس کے برانڈ ایمبسڈ تھے ایسے میں ذرائع کا کہنا ہے کہ پرکاش راج سے پوچھ تاچھ کرنا بے حد ضروری ہے۔

ای ڈی ذرائع کے مطابق تمل ناڈو واقع تریچی کے مشہور پرنو جویلرس کے یہاں پی ایم ایل اے کے تحت کل سرچ آپریشن کے دوران کئی ایسے کاغذات ملے تھے جس سے تقریباً 23 لاکھ 70 ہزار روپے کے مشتبہ لین دین کی جانکاری ملی ہے۔ اتنا ہی نہیں، ای ڈی نے تلاشی کے دوران 11 کلو 60 گرام سونے کے زیورات کو بھی ضبط کیا تھا۔ اس کے بعد اداکار پرکاش راج کو اس معاملے میں پوچھ تاچھ کے لیے طلب کیا گیا ہے۔ 10 دنوں کے اندر انھیں ای ڈی کے سامنے حاضر ہونا ہوگا۔ ان سے چنئی میں پوچھ تاچھ کی جائے گی۔

واضح رہے کہ ای ڈی نے تریچی کے تحقیقاتی معاشی جرائم سیل کے ذریعہ درج ایک ایف آئی آر کے بعد پرنو جویلرس کے خلاف پی ایم ایل اے کے تحت کیس درج کیا ہے۔ اس ایف آئی آر میں الزام ہے کہ پرنو جویلرس نے عوام سے کافی ریٹرن دینے کا وعدہ کر تقریباً 100 کروڑ روپے گولڈ سے جڑی ایک پونجی اسکیم میں سرمایہ کاری کروائی۔ لیکن بعد میں پرنو جویلرس اپنے وعدے سے پیچھے ہٹ گیا اور تمل ناڈو میں تمام شوروم راتوں رات بند کر دیے۔