بنگال: وزیر پارتھو چٹرجی کی قریبی ارپیتا کے خلاف ای ڈی نے پھر مارا چھاپہ، 29 کروڑ نقد اور 5 کلو سونا برآمد

کولکاتا: اساتذہ تقرری گھوٹالہ میں گرفتار بنگال کے وزیر پارتھو چٹرجی کی قریبی ساتھی ارپیتا مکھرجی کے گھر پر ای ڈی نے بدھ کے روز چھاپہ مارا۔ ای ڈی نے ارپیتا کے اس گھر سے بھی نوٹوں کا خزانہ برآمد کیا ہے۔ رپورٹ کے مطابق ای ڈی نے تقریباً 18 گھنٹے تک اس گھر کی تلاشی لی، جس میں 29 کروڑ روپے نقد اور زیورات اور بسکٹ کی شکل میں 5 کلو سونا برآمد ہوا۔ نوٹوں کی گنتی رات بھر جاری رہی۔

خیال رہے کہ اس سے پہلے بھی ای ڈی نے ارپیتا کے ایک اور گھر پر چھاپہ مارا ہے، جس میں تحقیقاتی ایجنسی نے 20.9 کروڑ روپے نقد اور تمام جائیدادوں کے دستاویزات برآمد کیے تھے۔ تحقیقاتی ایجنسی سے وابستہ ذرائع کے مطابق ارپیتا مکھرجی کے دونوں فلیٹس سے اب تک 50 کروڑ روپے کی نقدی برآمد ہوئی ہے۔

قبل ازیں، بدھ کی شام تفتیشی افسران کی ٹیم کولکاتا کے بیلگھریا علاقے میں ارپیتا کے گھر پہنچی اور فلیٹ کی چابی نہ ہونے کی وجہ سے افسران تالا توڑ کر اندر داخل ہو گئے۔ رپورٹس کے مطابق ارپیتا مکھرجی کے اس گھر سے بھی بڑے پیمانے پر نقد رقم برآمد ہونے پر افسران دنگ رہ گئے اور فوری طور پر بینک حکام کو موقع پر طلب کر کے نوٹوں کی گنتی شروع کرائی گئی۔ ذرائع کے مطابق افسران نے جائیداد کی کچھ دیگر دستاویزات بھی برآمد کئے ہیں۔ ارپیتا مکھرجی کے گھر سے برآمد ہونے والی اس رقم کی گنتی چار بینک ملازمین نے کی اور گنتی کے لئے 5 مشینیں استعمال کی گئیں۔

خیال رہے کہ پارتھو چٹرجی اور ارپیتا مکھرجی فی الحال 3 اگست تک ای ڈی کی حراست میں ہیں۔ گرفتاری کے بعد جانچ ایجنسی کے اہلکاروں کو پارتھو کو اسپتال میں داخل کرانا پڑا تھا۔ ان سے اساتذہ بھرتی گھوٹالہ کے بارے میں مسلسل پوچھ گچھ کی جا رہی ہے۔ ای ڈی کا دعویٰ ہے کہ ارپیتا کے گھر سے جو رقم برآمد ہوئی ہے وہ گھوٹالہ کے ذریعے کمائی گئی ہے اور اس کے مالک پارتھو چٹرجی ہیں۔