دہلی: دوَارکا-نجف گڑھ ’گرے لائن‘ پر میٹرو خدمات کا آغاز

نئی دہلی: مرکزی وزیر مملکت برائے شہری رہائشی (آزادانہ چارج) ہردیپ سنگھ پوری اور دہلی کے وزیراعلی اروند کیجریوال نے جمعہ کو یہاں میٹرو بھون سے باہری دہلی کےنجف گڑھ علاقے کو دوارکا سے جوڑنے والی دہلی میٹرو کے دوارکا۔نجف گڑھ کوریڈور کا افتتاح کیا۔ سیفٹی کمشنر جنک کمار گرگ نے اس لائن کو محفوظ منظوری کا سرٹیفیکیٹ 26 ستمبر کو جاری کیا تھا۔

اس کوریڈور کی لمبائی 29ء4 کلومیٹر ہے اور اسے ملا کر اب دہلی میٹرو نٹ ورک کی لمبائی بڑھ کر 377 کلومیٹر ہوگئی ہے۔ کوریڈور میں 75ء2 کلومیٹر ایلی ویٹیڈ اور 54ء1 کلومیٹر زیر زمین ہے۔ اس کوریڈور میں دوارکا، نانگلوئی اور نجف گڑھ تین اسٹیشن ہیں۔شام پانچ بجے سے یہ لائن عوام کے لئے کھول دی گئی۔ اس کوریڈور پر دوارکا سے ٹرینوں کو بدلنے کی سہولت ہے اور یہ اسٹینڈرڈ گیج لائن ہے اور اسے گرے لائن کے نام سے جانا جائے گا۔

واضح رہے کہ گرے لائن فیز 3 میٹرو کا آخری کوریڈور ہے۔ اس سے نجف گڑھ اور اس کے آس پاس کے دیہی علاقہ میٹرو سے براہ راست جڑ گئے ہیں۔ اب گرے لائن پر سفر کرنے والے مسافر نجف گڑھ سے نوئیڈا صرف ایک گھنٹے میں پہنچ جائیں گے۔ نجف گڑھ کے آس پاس کے تمام علاقوں سے ایئر پورٹ کے لئے سفر بھی اب آسان ہو جائے گا۔ نجف گڑھ سے دوارکا اب صرف 6 منٹ میں پہنچا جا سکتا ہے، پہلے اس فاصلہ کو طے کرنے میں آدھا گھنٹہ لگتا تھا۔