دہلی این سی آر میں تیز دھول بھری آندھی، نوئیڈا کے کئی سیکٹر میں بجلی منقطع

دارالحکومت دہلی میں جمعہ کی رات گرمی کے درمیان تیز دھول  بھری آندھی آئی ۔ اس سے قبل یہ معلومات دیتے ہوئے محکمہ موسمیات نے کہا تھا کہ 50 سے 70 کلومیٹر کی رفتار سے آندھی آ سکتی ہے۔ آندھی  کی وجہ سے دہلی سے متصل نوئیڈا میں سڑکوں پر خاموشی چھا گئی۔ آندھی کے باعث درخت ٹوٹ کر سڑک پر گر گئے۔ کئی سیکٹرز کی بجلی  بھی کاٹ دی گئی۔

محکمہ موسمیات نے ایکس کو بتایا کہ پوری دہلی اور این سی آر کے آس پاس کے علاقوں  جیسے لونی دیہات، ہنڈن اے ایف اسٹیشن، غازی آباد، اندرا پورم، چھپرولا، نوئیڈا، دادری، گریٹر نوئیڈا، گروگرام، فرید آباد وغیرہ  میں آندھی کی رفتار 50-70 کلومیٹر فی گھنٹہ کی تھی۔

نیوز پورٹل ’اے بی پی‘ پر شائع خبر کے مطابق محکمہ موسمیات نے کہا تھا کہ جمعہ یعنی 10 مئی کی رات 10 بجے دہلی میں تیز ہوا چلی۔ اجوا میں 77 کلومیٹر فی گھنٹہ، ظفر پور میں 57 کلومیٹر فی گھنٹہ، لودھی روڈ میں 61 کلومیٹر فی گھنٹہ، پرگتی میدان میں 63 کلومیٹر فی گھنٹہ، پیتم پورہ میں 57 کلومیٹر فی گھنٹہ، نارائنا میں 50 کلومیٹر فی گھنٹہ اور نجف گڑھ میں 40 کلومیٹر فی گھنٹہ کی رفتار سے ہوائیں چلیں۔

محکمہ موسمیات کے مطابق جمعہ کو دہلی میں پارہ 39 ڈگری پر رہا۔ اس سال پہلی بار پارہ معمول پر رہا۔ ہفتہ اور اتوار کو بارش کا قوی امکان ہے۔ ہفتہ کو شہر میں زیادہ سے زیادہ درجہ حرارت 39 اور کم سے کم درجہ حرارت 29 ڈگری سیلسیس رہنے کا امکان ہے۔