لاک ڈاؤن کے دوران کام سے محروم نوجوان ’بھگوان‘ سے نالاں! مندر میں کی توڑ پھوڑ

نئی دہلی: قومی راجدھانی دہلی کے پشچم پوری علاقہ میں پیش آنے والے ایک عجیب و غریب واقعہ میں ایک نوجوان نے مندر میں رکھی مورتیوں کو اس لئے نشانہ بنایا کیونکہ کورونا لاک ڈاؤن کے دوران اس کا ذریعہ معاش بند ہو گیا اور وہ سخت معاشی تنگی کا سامنا کر رہا تھا۔

پولیس کے مطابق ہفتہ کے روز صبح تقریباً 9 بجے پشچم پوری کے ماتا ویشنو مندر کے کاہن (پجاری) رام پاٹھک جب مندر آئے تو انہوں نے دیکھا کہ مندر کے کھلے حصہ میں رکھی دیوتا شیو کی دو مورتیاں اپنی جگہ پر نہیں ہیں۔ اس کے علاوہ کچھ دیگر مورتیاں بھی نقصان زدہ نظر آ رہی تھیں۔

مندر کے احاطہ میں اینٹ اور پتھر بھی بکھرے ہوئے تھے۔ کاہن نے اس کی معلومات پولیس کو دی۔ رام پاٹھک کے مطابق رات میں جب وہ مندر سے باہر نکلے تو اس وقت مندر کی تمام چیزیں اپنے ٹھکانے پر صحیح سلامت موجود تھیں۔ کاہن کی شکایت پر پولیس نے معاملہ کی جانچ پڑتال شروع کی تو معلوم چلا کہ اس واقعہ میں 28 سالہ وکی کا ہاتھ ہے۔ پولیس نے جب اسے حراست میں لے کر پوچھ گچھ کی تو اس نے بتایا کہ لاک ڈاؤن سے قبل وہ کباڑ جمع کرنے کا کام کرتا تھا، جو بند ہو گیا تھا۔ نیز اس نے بھگوان سے کہا تھا کہ تونے مجھے بھکاری بنایا میں اس کا بدلہ ضرور لوں گا۔

خیال رہے کہ گزشتہ سال مارچ کے مہینے میں کوورونا کے معاملہ بڑھنے کے سبب حکومت نے لاک ڈاؤں کا اعلان کر دیا تھا، جس کا خمیازہ سب سے زیادہ دہاڑی مزدوروں کو اٹھانا پڑا۔ لاکھنوں یومیہ مزدوروں کو سینکڑوں میل سفر کر کے اپنے گاؤں کا رخ کرنے پر مجبور ہونا پڑا تھا۔