اتر پردیش میں شدید گرمی، تیز دھوپ اور ہیٹ ویو کی وجہ سے لوگ گھروں میں قید

لکھنؤ: شمالی ہندوستان میں شدید گرمی عوام پریشان ہیں۔ یوپی، بہار، راجستھان سمیت کئی ریاستوں میں درجہ حرارت 45 ڈگری کو پار کر گیا ہے۔ محکمہ موسمیات نے یوپی میں دو دن کا اورنج الرٹ جاری کیا ہے۔ لوگوں کو سورج کی روشنی اور گرمی کی لہر سے بچنے کا مشورہ دیا گیا ہے۔ گرمی سے کئی لوگ جان کی بازی ہار چکے ہیں۔ لکھنؤ کے گومتی نگر جیسے علاقوں میں بھی ہیٹ ویو کی وجہ سے لوگ سڑکوں پر نہیں نکل رہے ہیں۔ گرمی سے نجات کے لیے بعض مقامات پر میٹھا شربت بھی تقسیم کیا جا رہا ہے۔

دوپہر کے وقت لکھنؤ کی سڑکوں پر مکمل خاموشی رہی۔ شدید گرمی کے باعث لوگوں کا گھروں سے نکلنا مشکل ہو گیا۔ محکمہ موسمیات نے رات 11 سے 4 بجے تک ریڈ الرٹ جاری کر دیا اور لوگوں سے گھروں کے اندر رہنے کی اپیل کی گئی۔ ماہر موسمیات اتل کمار کے مطابق اتر پردیش میں ہیٹ ویو جاری رہے گی اور ایک ہفتے تک ریڈ اور یلو الرٹ جاری رہے گا۔

ہندوستان کے محکمہ موسمیات (آئی ایم ڈی) نے اتر پردیش، ہریانہ، چنڈی گڑھ، دہلی کے کچھ علاقوں میں شدید گرمی اور گرمی کی لہر کا الرٹ جاری کیا ہے۔ اس کے علاوہ جموں، ہماچل پردیش، پنجاب، راجستھان، بہار اور جھارکھنڈ میں لوگوں کو گرمی کی لہر سے راحت نہیں مل رہی ہے۔ اس کے علاوہ آسام، میگھالیہ، اروناچل پردیش، سکم اور سب ہمالیائی مغربی بنگال میں 18 جون تک شدید بارش کا ریڈ الرٹ جاری کیا گیا ہے۔

اس کے ساتھ ہی دہلی میں 20 جون سے موسم بدل سکتا ہے اور گرج چمک کے ساتھ ہلکی بارش کا امکان ہے۔ اس دوران تیز ہوائیں چلتی رہیں گی۔ آئی ایم ڈی کے مطابق اس پورے ہفتے دہلی کا زیادہ سے زیادہ درجہ حرارت 42 سے 45 ڈگری سیلسیس رہنے کا امکان ہے اور کم سے کم درجہ حرارت 32 سے 35 ڈگری سیلسیس کے آس پاس رہنے کا امکان ہے۔