حیدرآباد: مچھروں کی افزائش روکنے کے لئے ڈرون کا استعمال

حیدرآباد: گریٹر حیدرآباد میونسپل کارپوریشن (جی ایچ ایم سی) نے بیماریوں کا ذریعہ بننے والے مچھروں کی افزائش کو روکنے کیلئے انوکھی پہل کی ہے جو لائق ستائش ہے۔ تالاب، جھیل مچھروں کی افزائش کا اہم ذریعہ ہیں جس سے ڈینگی، چکن گنیا اور دیگر بیماریاں پھیلتی ہیں۔ کارپوریشن نے تجرباتی بنیادوں پر ڈرونس کے ذریعہ ان میں مچھر کش دواوں کے چھڑکاو کی مہم شروع کی ہے۔

کارپوریشن نے اس کام کے ذریعہ میاں پورجھیل اور ملکم چیرو رائے درگم میں مچھر کش دوا کا چھڑکاؤ کیا ہے۔ بلدیہ نے اس مقصد کے لئے دس لیٹر گنجائش والے ڈرون کا استعمال کیا ہے جس میں مچھر کش دوا رکھتے ہوئے اس کا کامیابی کے ساتھ چھڑکاؤ کیا گیا۔ ہر ایکڑ اراضی پر ڈرون کے ذریعہ مچھرکش دوا کے چھڑکاؤ کا کام کیا گیا اور یہ کام تقریباً دس منٹ میں پورا کردیا گیا۔

عموماً اس عمل کی انسانوں کے ذریعہ انجام دہی کے لئے تقریباً دو ہفتے درکار ہوا کرتے تھے اور جھیل کے مکمل علاقہ کا احاطہ کرنے کیلئے 20 تا 25 ورکرس درکار ہوتے تھے تاہم دس منٹ میں ڈرون کے ذریعہ یہ کام انجام دیا گیا۔ یہ ڈرون فی گھنٹہ 5 تا چھ ایکڑ پر چھڑکاؤ کا کام کرسکتا ہے۔ انسانوں کے ذریعہ جھیلوں میں مچھرکش دوا کے چھڑکاؤ کیلئے ہرماہ 15 تا 20 لاکھ روپئے درکار ہوتے تھے تاہم اس انوکھے قدم کے ذریعہ یہ کام کافی کفایتی ہوگیا۔

اس طریقہ کار سے تلنگانہ کی 45,612 جھیلوں میں مچھر کش دوا کی چھڑکاؤ کی توقع ہے۔ جی ایچ ایم سی کے عہدیداروں نے وقت، افرادی وقت کو بچانے کیلئے ڈرون کے ذریعہ مچھر کش دوا کے چھڑکاؤ کا کام کیا۔ یہ کام کفایتی بھی ہے۔ کارپوریشن نے اس مقصد کے لئے MARUT نامی حیدرآبادی کمپنی کے ساتھ اشتراک کیا۔ نہروں کے جنگلی پودوں میں عموماً مچھروں کی افزائش ہوتی ہے تاہم اس طرح کے قدم سے کافی کم وقت اور کم افرادی قوت کے ساتھ مچھروں کی افزائش کو روکنے کا کام انجام دیا گیا ہے۔