دہلی: ایل جی کی حلف برداری تقریب سے ناراض ہو کر کیوں چلے گئے ڈاکٹر ہرش وردھن؟

سابق مرکزی وزیر اور بی جے پی رکن پارلیمنٹ ڈاکٹر ہرش وردھن دہلی کے نئے لیفٹیننٹ گورنر ونئے کمار سکسینہ کی حلف برداری سے ناراض ہو کر لوٹ گئے۔ حلف برداری تقریب میں سابق مرکزی وزیر کو جس جگہ پر بٹھایا جا رہا تھا وہ اس سے مطمئن نہیں تھے۔ دراصل دہلی کے نئے لیفٹیننٹ گورنر ونئے کمار سکسینہ نے جمعرات کو دہلی کے 22ویں لیفٹیننٹ گورنر کی شکل میں حلف برداری کی۔ صدر جمہوریہ رام ناتھ کووند نے دو دن پہلے ہی ان کی تقرری کا حکم جاری کیا تھا۔

لیفٹیننٹ گورنر کی حلف برداری تقریب سے باہر جاتے ہوئے ڈاکٹر ہرش وردھن نے شکایت بھرے لہجے میں کہا کہ حلف برداری تقریب میں رکن پارلیمنٹ کے لیے ایک سیٹ تک نہیں رکھی گئی۔ انھوں نے دہلی کے چیف سکریٹری نریش کمار سے کہا کہ ’’میں لیفٹیننٹ گورنر ونئے سکسینہ کو اس بارے میں لکھوں گا۔‘‘

میڈیا رپورٹس کے مطابق افسران انھیں منانے کے لیے ان ک ے پیچھے گئے، لیکن ڈاکٹر ہرش وردھن نہیں رکے۔ وہ تقریب کے مقام سے باہر نکلے اور اپنی گاڑی میں بیٹھ کر چلے گئے۔ جس وقت ڈاکٹر ہرش وردھن ناراض ہو کر جلسہ گاہ سے نکلے، اس وقت حلف برداری تقریب شروع نہیں ہوئی تھی۔