بابر پور ضلع سے سماجوادی پارٹی کے درجنوں کارکنان کانگریس میں شامل

نئی دہلی: دہلی پردیش کانگریس صدر اروندر سنگھ لولی کی قیادت میں آج شمال مشرقی دہلی کے بابر پور ضلع سے وابستہ سماجوادی پارٹی کے درجنوں کارکنان کانگریس میں شامل ہوئے ہیں۔ کانگریس میں شامل ہونے والے لیڈروں میں ریکھا وشسٹھ، سنیل کمار کے نام قابل ذکر ہیں جو اپنے درجنوں حامیوں کے ساتھ کانگریس میں شامل ہوئے ہیں۔

قابل ذکر ہے کہ اروندر سنگھ لولی نے ریاستی صدر بننے کے فوراً بعد پارٹی چھوڑنے والے دہلی کے تمام لیڈروں سے کانگریس میں شامل ہونے کی اپیل کی تھی جس کے تحت ریاستی سطح، ضلع سطح کے لیڈر، سابق کارپوریشن کونسلر، بی جے پی اور عام آدمی پارٹی سمیت دیگر جماعتوں کے عہدیداران مسلسل کانگریس میں شامل ہو رہے ہیں۔

آج سماجوادی پارٹی لیڈروں کے کانگریس میں شامل ہونے کے موقع پر ریاستی صدر اروندر سنگھ لولی نے پارٹی کارکنوں سے خطاب کرتے ہوئے کہا کہ راہل گاندھی جی کی بھارت جوڑو یاترا کے بعد لوگوں میں راہل جی کا احترام بڑھتا جا رہا ہے اور کانگریس کے نظریہ پر اعتماد مسلسل بڑھ رہا ہے۔ انہوں نے مزید کہا کہ بی جے پی کی مرکزی حکومت اور ریاستی حکومت کے لاتعلق رویہ اور دہلی میں آپسی الزام تراشی کی سیاست کی وجہ سے دہلی کی ترقی مکمل طور پر ٹھپ ہو کر رہ گئی ہے۔ انہوں نے کہا کہ دونوں پارٹیوں نے نہ صرف دلکش وعدے کر کے دہلی کے عوام کو دھوکہ دیا ہے بلکہ دہلی میں بڑھتی ہوئی بے روزگاری اور مہنگائی پر بھی قابو نہیں پایا ہے۔

اروندر لولی نے کہا کہ بی جے پی کا ایجنڈا صرف سماج میں نفرت پھیلانا ہے، وہیں دوسری طرف دہلی حکومت ترقیاتی کاموں کی کمی کا الزام بی جے پی پر ڈال کر اپنی ذمہ داری سے بھاگ رہی ہے، جس کی وجہ سے دہلی کے عوام بنیادی سہولتوں سے محروم ہوتے جا رہے ہیں۔ انہوں نے کہا کہ جہاں ایک طرف دوسری پارٹیوں کے کانگریس کارکنوں کی گھر واپسی سے تنظیم مضبوط ہو رہی ہے، وہیں دوسری طرف ہم کانگریس کارکنوں کو ذمہ داریاں دے کر بوتھ لیول تک ووٹروں سے رابطہ کرنے کی مہم چلا رہے ہیں۔

بابر پور ضلع کانگریس کمیٹی کے صدر چودھری زبیر احمد نے کہا کہ جب سے اروندر سنگھ لولی جی نے دہلی کی کمان سنبھالی ہے تب سے لوگوں میں ایک نیا جوش آگیا ہے۔ انہوں نے کہا کہ ہمارے پاس ایسے لیڈران اور معزز لوگوں کی لمبی فہرست موجود ہے جنہوں نے کانگریس سے دوری بنا لی تھی لیکن وہ اب دوبارہ کانگریس میں شامل ہونا چاہتے ہیں، انہیں بھی جلد کانگریس کی رکنیت دلائی جائے گی اور کانگریس کا کارواں مزید مضبوط بنایا جائے گا۔