پی ایم مودی کے پارلیمانی حلقہ میں ڈاکٹرس بن گئے ’پھیری والے‘، گھر-گھر پہنچ کر مریضوں کی کر رہے جانچ

ہندوستان میں کورونا کا قہر اپنے عروج پر ہے۔ اہم بات یہ ہے کہ اس بار شہروں کے ساتھ ساتھ گاؤں میں بھی کورونا انفیکشن نے تباہی مچا رکھی ہے۔ ان مشکل حالات کو دیکھتے ہوئے وزیر اعظم نریندر مودی کے پارلیمانی حلقہ وارانسی کے کچھ ڈاکٹروں نے ایک نئی پیش قدمی کی ہے۔ گاؤں میں یہ ڈاکٹرس ’پھیری والے‘ کی طرح گھر گھر جا کر بخار اور آکسیجن لیول چیک کرنے کی گہار لگاتے ہیں اور پھر ضرورتمندوں کو ضروری مشورہ اور دوائیں دیتے ہیں۔ بی ایچ یو کے ان جنونی ڈاکٹروں نے اس پیش قدمی کو ’آکسیجن پھیری والا‘ نام دیا ہے۔

دراصل بی ایچ یو کے نیورولوجی محکمہ کے پروفیسر ڈاکٹر وجے ناتھ مشر، ڈاکٹر ابھشیک پاٹھک وغیرہ ڈاکٹروں نے گاؤں-گاؤں مشتبہ کورونا مریضوں کی شناخت کرنے کی مہم شروع کی ہے۔ آکسی میٹر، تھرما میٹر جیسے آلات اور دواؤں کے ساتھ بی ایچ یو کے ڈاکٹروں کی ٹیم بنارس کے گاؤوں میں پہنچ رہی ہے۔ اب تک یہ ٹیم بنارس کے ڈافی، رمنا گاؤں میں گھر گھر جا کر لوگوں کے آکسیجن لیول کی جانچ کر مشتبہ مریضوں کو دوائیں دے چکی ہے۔

بی ایچ یو کے نیورولوجسٹ ڈاکٹر وجے ناتھ مشر نے خبر رساں ادارہ آئی اے این ایس کو بتایا کہ نیورولوجی محکمہ کے داکٹروں نے یہ پیش قدمی کی ہے تاکہ ہم گاؤں میں رہنے والوں کی اس وبا سے جان بچا سکیں۔ گاؤں کے لوگ کورونا انفیکشن کی زد میں آنے پر بھی اسے موسمی بخار مان کر لاپروائی کرتے ہیں جس سے زندگی خطرے میں پڑ جاتی ہے۔ گاؤں میں لوگوں کے پاس ہوم آئسولیشن کی دوائیں اور پلس آکسی میٹر وغیرہ نہیں رہتے۔ ایسے میں ڈاکٹروں کی ٹیم گاؤں میں جا کر لوگوں کے آکسیجن سیچوریشن کی جانچ کر رہی ہے۔ کووڈ-19 کی علامت والوں کو دوائیں دی جا رہی ہیں۔ سنگین مریضوں کو وارانسی کے اسپتال میں داخل کرانے میں بھی ہم مدد کر رہے ہیں۔

بی ایچ یو کے ڈاکٹروں نے سماجی اداروں کی مدد سے دواؤں کا انتظام کیا ہے۔ ’سیوا بھارتی‘ جیسے ادارے بھی تعاون کر رہے ہیں۔ گرام پردھانوں کو آکسی میٹر اور دوائیں دی جا رہی ہیں تاکہ گاؤں میں کورونا متاثرہ مریضوں کے علاج میں مدد ہو سکے۔ اب آکسیجن لیول کا پتہ لگانے کے لیے لوگوں کو اسپتالوں کا چکر نہیں کاٹنا پڑ رہا ہے۔ ڈاکٹر وجے مشر کے مطابق یہ مہم لگاتار چلتی رہے گی۔ واضح رہے کہ بی ایچ یو کے نیورولوجی محکمہ کے 5 ڈاکٹروں نے مل کر قبل میں وارانسی میں مہامنا آکسیجن پوائنٹ بھی شروع کیا ہے۔ اس سے مریضوں کو گاڑی کے ذریعہ سے آکسیجن دستیاب کرایا جا رہا ہے۔