دھیریندر شاستری کا متنازعہ بیان، بغیر ’سندور‘ اور ’منگل سوتر‘ والی خاتون کو قرار دیا خالی پلاٹ! خاتون کمیشن میں شکایت درج

نئی دہلی: باگیشور دھام کے بابا پنڈت دھیریندر شاستری اپنے ایک بیان کو لے کر تنازع میں آگئے ہیں۔ انہوں نے خواتین کے بارے میں ایسا بیان دیا ہے جس پر خواتین کی تنظیموں نے اعتراضات اٹھائے ہیں۔ آزاد ادھیکار سینا نامی تنظیم کی قومی جنرل سکریٹری نوتن ٹھاکر نے بابا باگیشور دھام کے سربراہ دھیریندر شاستری کے اس بیان کے خلاف قومی خواتین کمیشن سے شکایت کی ہے۔ گریٹر نوئیڈا میں ایک مذہبی تقریب کے دوران دھیریندر شاستری نے بغیر سندور اور منگل سوتر کا موازنہ خالی پلاٹ سے کیا تھا!

سماجی کارکن نوتن ٹھاکر نے الزام لگایا ہے کہ گریٹر نوئیڈا میں منعقد ’بھاگوت کتھا‘ کے دوران دھیریندر شاستری نے خواتین کے لیے نازیبا الفاظ استعمال کیے، جس کی وجہ سے ہندوستان کی خواتین شرمندگی اور ذلت محسوس کر رہی ہیں۔ انہوں نے دعویٰ کیا کہ دھیریندر شاستری کے بیان کے بعد سوشل میڈیا پر میمز بنا کر خواتین کے لیے ہر طرح کے نازیبا تبصرے کیے جا رہے ہیں۔

نوتن ٹھاکر نے کہا ’’دھریندر شاستری نے گریٹر نوئیڈا میں کتھا کے دوران کہا تھا کہ جن خواتین کے گلے میں سندور اور منگل سوتر نہیں ہوتا، ہم سمجھتے ہیں کہ یہ پلاٹ ابھی تک خالی ہے۔‘‘ ٹھاکر نے کہا کہ کسی خاتون کا موازنہ پلاٹ سے کیا جانا اور خواتین کے تعلق سے اس طرح کا نازیبا تبصرہ کیا جانا نامناسب ہے۔ اس کے علاوہ یہ یہ خواتین کی عزت کے ساتھ کھلواڑ ہے۔ انہوں نے کہا کہ ان حقائق کو ملحوظ خاطر رکھتے ہوئے قومی کمیشن برائے خواتین سے فوری کارروائی کرنے کا مطالبہ کیا گیا ہے۔

قابل ذکر ہے کہ بابا باگیشور دھام سرکار نے گریٹر نوئیڈا میں 7 روزہ بھاگوت کتھا کا اہتمام کیا تھا، جو گزشتہ ہفتہ کو اختتام پذیر ہوئی تھی۔ اس دوران انہوں نے کہا تھا کہ "جس عورت کی شادی ہو گئی ہے اس کی دو شناخت ہیں۔ جس عورت کی مانگ میں سندور اور گلے میں منگل سوترنہ ہو تو سمجھ لیں کہ پلاٹ خالی ہے!‘‘