ہندوستانی عازمین کی روانگی کا سلسلہ شروع، دہلی سے 400 عازمین روانہ

نئی دہلی: حج بیت اللہ 2018 کے لئے ہندوستانی عازمین حج کی روانگی کا سلسلہ آج (14 جولائی) سے شروع ہوگیا ہے۔ روانگی کے پہلے مرحلے میں دہلی اور دیگر 6 ریاستوں (اترپردیش، ہریانہ، ہماچل پردیش، چنڈی گڑھ، پنجاب اور جموں و کشمیر) سے عازمین حج کی روانگی ہوگی۔ دہلی میں اندرا گاندھی انٹرنیشنل ٹرمنل-2 کو امبارکیشن پوائنٹ بنایا گیا ہے جو ملک کا سب سے بڑا امبارکیشن پوائنٹ ہے۔

دہلی میں مرکزی وزیر برائے اقلیتی امور مختار عباس نقوی اور دہلی کے غذا و ترسیل کے وزیر عمران حسین 400 عازمین کی روانگی کے وقت موجود رہے۔ روانہ ہوتے وقت عازمین سے ملک کی خوش حالی اور بھائی چارے کی دعا کرنے کی درخواست کی گئی۔ دہلی حج کمیٹی کے سپرنٹنڈنٹ محسن کے مطابق اس سال دہلی سے تقریباً 19 ہزار عازمین 48 پروازوں سے حج بیت اللہ کے مقدس سفر پر روانہ ہوں گے۔ روانگی کا یہ سلسلہ 14 جولائی سے 28 جولائی تک جاری رہے گا۔

اترپردیش سے 14 جولائی کو حج بیت اللہ کے لئے روانہ ہونے والے عازمین حج لکھنؤ کے سروجنی نگر میں واقع حج ہاؤس پہنچ چکے ہیں یہاں سے عازمین حج کا پہلہ قافلہ روانہ ہوگا۔ لکھنؤ کے اموسی ہوائی اڈے سے عازمین حج کا پہلا قافلہ دوپہر جبکہ دوسرا قافلہ رات کو روانہ ہوگا۔ لکھنؤ میں اترپردیش کے اقلیتی امور کے وزیر لکشمی نارائن چودھری عازمین حج کو سبز پرچم دکھا کر روانہ کریں گے۔

حج بیت اللہ کے لئے روانہ ہونے سے قبل تمام عازمین حج کواپنی آمد درج کرانی ہوتی ہے۔ اس مرتبہ حج کمیٹی نے عازمین حج کو آن لائن طریقہ سے آمد درج کرانے کی بھی سہولت فراہم کی ہے، جس سے انہیں کافی راحت ہوئی۔