دہلی اور شمالی ہندوستان میں دھند کے باعث سفر میں دشواری، 50 سے زائد ٹرینیں اور متعدد پروازیں متاثر

دہلی اور اس کے گرد و نواح سمیت شمالی ہندوستان کے مختلف شہروں میں گزشتہ دو دن سے شدید دھند کی وجہ سے صورتحال ابتر ہے۔ آج تیسرے دن بھی موسم کی یہی کیفیت برقرار رہی، جس کے باعث سردی میں اضافے کے ساتھ دھند نے لوگوں کی زندگی کو متاثر کیا ہے۔ صبح کے اوقات میں خاص طور پر حد نگاہ اتنی کم ہو گئی کہ لوگوں کو آمد و رفت میں مشکلات کا سامنا کرنا پڑ رہا ہے۔

شمالی ہندوستان کے متعدد شہر اس وقت دھند اور کوہرے کی لپیٹ میں ہیں۔ صبح نو بجے تک حد نگاہ اتنی کم رہی کہ سڑکوں اور ریل گاڑیوں کے سفر میں رکاوٹ پیدا ہوگئی۔ اس کے ساتھ ساتھ دہلی کے مختلف ریلوے اسٹیشنوں پر بھی ٹرینیں تاخیر کا شکار ہیں، جس کی وجہ سے مسافروں کو پریشانی کا سامنا ہے۔

دہلی ایئرپورٹ اور گرد و نواح کے علاقوں میں پروازیں بھی متاثر ہوئی ہیں۔ دہلی ایئرپورٹ پر کئی پروازیں تاخیر کا شکار ہیں اور مختلف شہروں سے آنے والی پروازیں کوہرے کے باعث جے پور کی طرف موڑ دی گئی ہیں۔ رپورٹ کے مطابق امریتسر، چندی گڑھ اور لکھنؤ سے آنے والی پروازیں بھی متاثر ہوئی ہیں۔ فلائٹ ریڈار 24 کے مطابق، جمعرات کو دہلی ایئرپورٹ پر 300 سے زائد پروازیں تاخیر سے روانہ ہوئیں جبکہ 115 پروازیں دہلی پہنچنے میں تاخیر کا شکار ہوئیں۔

دہلی آنے جانے والی 50 سے زائد ٹرینوں کی تاخیر کے باعث این سی آر میں مختلف اسٹیشنز پر مسافروں کی تعداد میں اضافہ دیکھا گیا ہے۔ ٹرینوں اور پروازوں میں تاخیر کے باعث دہلی ایئرپورٹ، نئی دہلی، آنند وہار اور پرانی دہلی ریلوے اسٹیشن پر مسافروں کا رش لگا ہوا ہے۔