پستول لہرانے والے آشیش پانڈے کو عدالتی تحویل میں بھیجا گیا

نئی دہلی: دہلی کی ایک عدالت نے یہاں کے ایک فائیو اسٹار ہوٹل میں پستول لہرانے کے الزام میں بہوجن سماج پارٹی کے سابق رکن پارلیمان کے بیٹے آشیش پانڈے کو پیر تک کے لئے عدالتی تحویل میں بھیج دیا۔

بی ایس پی کے سابق رکن پارلیمان راکیش پانڈے کے بیٹے آشیش پانڈے پر 14اکتوبر کو حیات ریجنسی ہوٹل میں ایک خاتون کو پستول لہرا کر دھمکانے اور اسکے ساتھ گالی گلوج کرنے کا الزام ہے۔

اس معاملہ کے سوشل میڈیا پر آنے اور طول پکڑنے کے بعد آشیش نے پٹیالہ ہاؤس کورٹ میں کل خودسپردگی کی تھی جہاں اسے مجسٹریٹ نیتوشرما کی عدالت میں پیش کیا گیا۔ عدالت نے اسے ایک دن کی پولیس تحویل میں دیدیا تھا حالانکہ پولس نے 4 دن کے لئے حراست میں رکھنے کی درخواست کی تھی۔

عدالت نے آج معاملہ کی سماعت کرتے ہوئے اسے عدالتی تحویل میں بھیجنے کا حکم دیا۔ آشیش نے ضمانت کی درخواست کی تھی لیکن عدالت نے اسے حراست میں بھیج دیا۔

پولس نے اس معاملہ میں ہوٹل پر لاپروائی برتنے کا الزام لگایا اور وجہ بتاؤ نوٹس جاری کیا ہے۔ نوٹس کا جواب 15 دن میں دینے کو کہا گیا ہے۔