شدید بارش کی وجہ سے پانی بھر جانے سے دہلی والوں کی جان خطرے میں: کانگریس

نئی دہلی: دہلی پردیش کانگریس کے صدر دیویندر یادو نے اتوار کو کہا لگایا کہ دہلی کے شہری اپنی جانوں کی قربانی دے کر عام آدمی پارٹی (عآپ) اور بی جے پی حکومتوں کی ناکامیوں کا خمیازہ بھگت رہے ہیں، موسلادھار بارش کی وجہ سے پانی جمع ہونے سے دہلی والوں کی زندگی خطرے میں ہے۔

دیویندر یادو نے کہا کہ ہر سال دہلی میں شدید بارشوں، نالیوں کے بھرنے، گڑھے، ٹریفک جام، ٹوٹی ہوئی سڑکوں اور عمارتوں کے گرنے کی وجہ سے پانی بھر جانے سے لوگ جان سے ہاتھ دھو رہے ہیں۔ لیکن، بی جے پی اور عام آدمی پارٹی نے خراب صورتحال کو بہتر کرنے کے لیے کچھ نہیں کیا۔ مانسون سے پہلے ہم نے لیفٹیننٹ گورنر کو ایک خط لکھا تھا، جس کے ذریعے ہم اس بات کو یقینی بنانا چاہتے تھے کہ نکاسی آب کا نظام پوری طرح صاف ہو۔

انہوں نے کہا کہ لیفٹیننٹ گورنر کو باراپولا کا معائنہ کرنے کے لئے این جی ٹی کے حکم کا انتظار کیوں کرنا پڑا، جب دہلی کے آدھے سے زیادہ نالے بھرے ہوئے ہیں، یہ ہم نے پہلے ہی بتا دیا تھا۔ لیفٹیننٹ گورنر کے باراپولا کے معائنے کے دوران یہ واضح ہوا کہ باراپولا کی 12 کریکوں میں سے صرف 5 کام کر رہی ہیں اور کشک ڈرین کی 7 میں سے 4 کریک کام کر رہی ہیں۔

دیویندر یادو نے لیفٹیننٹ گورنر، دہلی حکومت، ڈی ڈی اے، دہلی میونسپل کارپوریشن سے پوچھا کہ نکاسی کے نظام کے لیے کون ذمہ دار ہے جو برسوں سے رکا ہوا ہے۔ یہ بدقسمتی کی بات ہے کہ جب بدعنوانی کے ملزم منیش سسودیا کو 17 ماہ بعد ضمانت ملنے پر عام آدمی پارٹی جشن منا رہی تھی، اسی وقت ماڈل ٹاؤن میں ایک غریب آدمی کی ایک حادثے میں موت ہو گئی۔ امن وہار میں گڑھے میں ڈوبنے سے 10 سالہ بچے کی موت پر دہلی صدمے میں ہے، دو روز قبل کراری میں ڈوب کر دو بچوں کی موت، گزشتہ ہفتے جہانگیر پوری میں تین افراد کی موت اور راجندر نگر میں طلباء کی موت ہوئی۔

انہوں نے کہا کہ حادثات میں جان گنوانے والے چاہے دہلی کے ووٹر نہ ہوں لیکن وہ انسان ہیں۔ مرکز میں بی جے پی کی حکومت ہے، دہلی اور کارپوریشن میں عام آدمی پارٹی کی حکومت ہے لیکن راجدھانی میں بڑھتے ہوئے واقعات، حادثات اور واقعات سے پہلے کوئی چوکسی نہیں لی جا رہی ہے۔ واقعات کے بعد ایک دوسرے پر الزام تراشی کا کام بہت اچھے طریقے سے کیا جا رہا ہے۔