راجدھانی دہلی میں منشیات کے گروہ کا پردہ فاش، 2000 کروڑ کی کوکین برآمد، 4 افراد گرفتار

نئی دہلی: دہلی پولیس نے ایک بڑے بین الاقوامی منشیات گروہ کا پردہ فاش کرتے ہوئے تقریباً 565 کلو کوکین برآمد کی ہے، جس کی قیمت عالمی منڈی میں 2000 کروڑ روپے سے زائد بتائی جا رہی ہے۔ یہ دہلی میں اب تک کی سب سے بڑی منشیات کی برآمدگی ہے۔ دہلی پولیس کی اسپیشل سیل نے اس کامیاب آپریشن میں 4 افراد کو گرفتار کیا ہے۔ منشیات کی یہ بڑی کھیپ جنوبی دہلی میں ایک چھاپے کے دوران پکڑی گئی۔

پولیس اس معاملے میں گرفتار افراد سے سخت تفتیش کر رہی ہے تاکہ یہ معلوم کیا جا سکے کہ اس کوکین کی ڈلیوری کس کو ہونی تھی اور اس منشیات کا گروہ کن دیگر افراد کے ساتھ جڑا ہوا ہے۔ اطلاعات کے مطابق یہ بین الاقوامی سطح پر کام کرنے والے ڈرگ سنڈیکیٹ کا حصہ ہے جو کوکین کی سپلائی کر رہا تھا۔

کوکین عام طور پر اعلیٰ درجے کی پارٹیوں میں استعمال ہونے والی ایک مہنگی اور خطرناک منشیات ہے اور دہلی پولیس کی یہ کامیابی نہ صرف ایک بڑی کارروائی ہے بلکہ شہر میں منشیات کی اسمگلنگ کو روکنے کے حوالے سے ایک اہم قدم بھی ہے۔ فی الحال مزید تحقیقات جاری ہیں اور پولیس کو امید ہے کہ اس گروہ کے مزید مرکزی ارکان کا پتہ چلایا جا سکے گا۔

اس سے قبل اتوار کو دہلی کے تلک نگر علاقے سے دو افغان شہریوں کو 400 گرام ہیروئن اور 160 گرام کوکین کے ساتھ گرفتار کیا گیا تھا۔ اسی دن، دہلی کسٹمز نے اندرا گاندھی بین الاقوامی ہوائی اڈے پر ایک مسافر سے 24 کروڑ روپے سے زیادہ کی 1660 گرام کوکین ضبط کی تھی۔ یہ مسافر لائبیریا کا شہری تھا، جو دبئی سے دہلی آیا تھا۔ اسے این ڈی پی ایس ایکٹ 1985 کے تحت گرفتار کیا گیا تھا۔