دہلی نیائے یاترا: ’کیجریوال جیسے لیڈران نے مفت وعدوں کے ذریعہ دہلی والوں کو دھوکہ دیا‘، دیویندر یادو

نئی دہلی: دہلی پردیش کانگریس کمیٹی کے صدر دیویندر یادو نے آج ’دہلی نیائے یاترا‘ کے گیارہویں دن صبح ایک نئے جوش کے ساتھ ’کرتویہ پتھ‘ پر چلتے ہوئے عوام کو انصاف دلانے کا عزم ظاہر کیا۔ انھوں نے قومی پرچم لہراتے ہوئے آج یاترا کی شروعات شاہدرہ اسمبلی حلقہ میں ای بلاک سیماپوری سے شروع کی۔ پرچم کو سلامی دینے کے بعد نیائے جنگجو رنویر سنگھ نے دیویندر یادو کو آئین کی کاپی بطور تحفہ پیش کر ایک نئی مثال قائم کی۔

آج ’دہلی نیائے یاترا‘ شاہدرہ اسمبلی، کرشنا نگر اسمبلی اور لکشمی نگر اسمبلی میں نکالی گئی۔ یاترا سے جڑنے کے لیے جگہ جگہ بنے اسٹیج پر دہلی کانگریس صدر دیویندر یادو اور نیائے جنگجوؤں کا استقبال کیا گیا۔ ہر اسٹیج سے یاترا کے ساتھ سینکڑوں کانگریس کارکنان کے ساتھ بڑی تعداد میں دہلی کی عوام بھی جڑتی دکھائی دی۔ عوام کی شرکت سے دہلی نیائے یاترا ہر قدم پر مضبوط ہو رہی ہے۔ اس دوران دیویندر یادو نے کہا کہ عوام کے درمیان کانگریس کی بڑھتی مقبولیت دہلی میں ایک بڑی تبدیلی کی طرف اشارہ کر رہی ہے۔

دیویندر یادو نے آج ’دہلی نیائے یاترا‘ کے دوران سیماپوری کے لوگوں سے ملاقات کر ان کے ذاتی مسائل و پریشانیوں کو سمجھنے کی کوشش کی۔ سیماپوری علاقہ میں جگہ جگہ گندگی اور کچرے کے ڈھیر لوگوں کی فکر بنے ہوئے ہیں۔ اس تعلق سے دیویندر یادو نے کہا کہ صرف ایک اسمبلی حلقہ نہیں بلکہ پوری دہلی میں گندگی اتنی زیادہ ہے کہ عوام پر اس کا برا اثر پڑ رہا ہے۔ گندگی کے ڈھیر اور کچرا عآپ حکومت کے کھوکھلے وعدوں اور دعووں کی حقیقت بیان کر رہے ہیں۔

دیویندر یادو نے کہا کہ عآپ حکومت کی ناکامی کے سبب دہلی والے گندگی میں زندگی گزارنے کو مجبور ہیں اور گندگی کی وجہ سے بیماری پھیل رہی ہے۔ دہلی میونسپل کارپوریشن اور دہلی حکومت کی لاپروائی کے سبب اس سال ابھی تک ریکارڈ توڑ 4533 ڈینگو کے معاملے درج ہوئے ہیں، جبکہ نومبر ماہ میں ہی 472 معاملے سامنے آئے ہیں۔ انھوں نے مزید کہا کہ کیجریوال کی رہنمائی والی دہلی حکومت نے دہلی کی ترقی کو ہی متاثر نہیں کیا بلکہ دہلی کی عوام کی صحت، تعلیم اور آس پاس کے علاقوں کے صاف رکھنے میں ناکام رہنے کے سبب ان کو ذہنی طور پر بھی متاثر کیا ہے۔

دیویندر یادو نے الزام عائد کیا کہ کیجریوال جیسے لیڈران نے مفت وعدوں کے ذریعہ دہلی والوں کو دھوکہ دیا ہے۔ کیجریوال نے مفت پانی، مفت بجلی، مفت تعلیم، مفت طبی دیکھ بھال جیسی ہمدردی بھری پالیسی کا اعلان تو کیا، لیکن یہی اب سزا ثابت ہو رہی ہیں۔ ان کے مفت وعدے صرف کاغذات میں نظر آ رہے ہیں، مفت کے نام پر لوگوں کے ساتھ دھوکہ کیا گیا ہے۔ گزشتہ 11 سالوں میں دہلی کے لوگوں کو دھوکہ کے علاوہ کچھ نہیں ملا۔ اس درمیان دیویندر یادو نے دہلی میں بڑھتی فضائی آلودگی پر بھی فکر کا اظہار کیا۔ انھوں نے یاترا کے دوران عوام کو مفت ماسک بھی تقسیم کیا اور کہا کہ وہ ماسک لگا کر رکھیں تاکہ زہریلی ہوا سے بچاؤ ہو سکے۔