دہلی: بچوں کا ’مستقبل‘ طے کرنے پر ہوئی بحث، شوہر نے بیوی کا کیا قتل

مغربی دہلی کے پنجابی باغ تھانہ کی پولس چوکی مادی پور علاقہ میں بچوں کے مستقبل کو لے کر شوہر اور بیوی کے درمیان شروع ہوا صلاح و مشورہ جھگڑے میں تبدیل ہو گیا۔ بات اس قدر بڑھ گئی کہ مار پیٹ تک کی نوبت آ گئی۔ غصے میں شوہر نے بیوی کا قتل کر دیا۔ پولس نے ملزم شوہر کو گرفتار کر لیا ہے۔ بتایا جاتا ہے کہ اس علاقے میں کئی کورونا پازیٹو معاملے سامنے آئے ہیں جس کی وجہ سے علاقہ کو کنٹنمنٹ زون میں رکھا گیا ہے اور یہ پوری طرح سے سیل ہے۔

پولس کا کہنا ہے کہ ہفتہ کی صبح تقریباً ساڑھے تین بجے پولس کنٹرول روم کو جانکاری ملی تھی کہ جے جے کالونی مادی پور میں شوہر-بیوی کے درمیان جھگڑا ہو گیا ہے۔ خبر ملنے کے بعد پولس موقع پر پہنچی تو اسے وہاں ایک خاتون کی لاش پڑی ہوئی ملی۔ پولس کو جھگڑے کی خبر دینے والا شخص شوہر ہی تھا جس کا نام رئیس الاعظم ہے۔ اس نے پولس کو بتایا کہ اپنی بیوی گلشن کا اس نے قتل کر دیا ہے۔ ضلع پولس کے مطابق 34 سالہ رئیس الاعظم جہانگیر پوری علاقے میں ریہڑی لگاتا ہے۔ اس نے کچھ وقت پہلے ہی خود سے پانچ سال بڑی گلشن سے شادی کی تھی۔ رئیس الاعظم اور گلشن دونوں کی ہی یہ دوسری شادی تھی۔

بتایا جاتا ہے کہ رئیس الاعظم کی پہلی بیوی سے تین بچے اور گلشن کے پہلے شوہر سے 6 بچے ہیں۔ سبھی بچے فی الحال رئیس الاعظم اور گلشن کے ساتھ ہی ایک کمرے کے مکان میں کسی طرح گزارا کر رہے ہیں۔ پولس کا کہنا ہے کہ واقعہ والی صبح رئیس الاعظم اور گلشن کے درمیان بچوں کے مستقبل کو لے کر بات چیت ہو رہی تھی۔ اسی درمیان دونوں میں جھگڑا شروع ہو گیا۔ تنازعہ کے دوران رئیس الاعظم نے اپنا ہوش کھو دیا اور بیوی گلشن کے سر پر لاٹھی سے حملہ کر دیا۔ حملہ اس قدر زوردار تھا کہ گلشن کی موت ہو گئی۔

پولس نے اس سلسلے میں مزید بتایا کہ چونکہ دونوں کی شادی کچھ ہی وقت پہلے ہوئی ہے لہٰذا واقعہ کی ایس ڈی ایم جانچ بھی کرائی جا رہی ہے۔ جس علاقے میں قتل ہوا ہے وہ علاقہ کورونا پازیٹو مریضوں کے کئی معاملے ملنے کے سبب کنٹنمنٹ زون بنا ہوا ہے، اس لیے واقعہ کی خبر باقی تمام متعلقہ محکموں کو بھی دی گئی ہے۔

غور طلب ہے کہ راجدھانی دہلی میں لاک ڈاؤن کے دوران گزشتہ 24 گھنٹے میں تین قتل کے واقعات ہوئے ہیں جس کی وجہ سے ایک افرا تفری کا عالم دیکھنے کو مل رہا ہے۔ گلشن قتل معاملہ کے چند گھنٹے پہلے ہی دوارکا ضلع چھابلہ تھانہ حلقہ میں ایک نوجوان نے بیوی کے ساتھ مل کر ماں اور باپ کا گھر کے اندر ہی قتل کر دیا تھا۔ اس دوہرے قتل معاملہ میں ملزم شوہر اور بیوی دونوں کو گرفتار کر لیا گیا ہے۔