دہلی میں 169 دن بعد پٹری پر لوٹی میٹرو، پہلے اس روٹ پر شروع ہوئی میٹرو سروس

نئی دہلی: دارالحکومت کی لائف لائن اورپبلک ٹرانسپورٹ کی ریڑھ کی ہڈی تصور کی جانے والی دہلی میٹرو کا سفر169 دن کے بعد پیر کو دوبارہ شروع ہو گیا۔ عالمی وبا کورونا کے قہر کی وجہ سے احتیاط کے طور پر گزشتہ تقریباً پانچ ماہ سے بند دہلی میٹروخدمات، ریپڈ میٹرو، گوروگرام سمیت یلو لائن سمے پور بادلی سے ہڈا سٹی سنٹر کے درمیان صبح 7 بجے سے بحال کردی گئیں۔

دہلی میٹرو ریل کارپوریشن (ڈی ایم آر سی) نے اس کے لئے مکمل تیاری کرلی تھی۔ کورونا انفیکشن کے پیش نظر اسٹیشن کے اندر صفائی ستھرائی کے بہتر انتظامات کیے گئے ہیں، تاہم صبح مسافروں کی زیادہ بھیڑ نہیں دیکھی گئی اور زیادہ تر کوچوں میں مسافر کم تھے۔ اسٹیشنوں کے باہر دہلی پولیس کے اہلکار تعینات تھے اور میٹرو اسٹیشن میں سی آئی ایس ایف کے افسران اور جوان پوری طرح مستعد نظر آئے۔

دہلی میٹرو ریل کارپوریشن (ڈی ایم آر سی) کے ترجمان کے مطابق آج اور کل منگل کے روز صرف ییلو لائن پر 07.00 سے 11.00 اور شام 16.00 سے 20.00 بجے تک میٹرو چلے گی۔ اس کے بعد 9 ستمبر کو 3/4 بلیو لائن، دوارکا سیکٹر 21 سے نوئیڈا الیکٹرانک سٹی ، ویشالی اور لائن سات (پنک لائن) مجلس پارک سے شیو وہار کی سروس شروع ہوگی۔ یہ خدمات صبح اور شام چار چار گھنٹے کے لئے ابھی دستیاب ر ہے گی۔ صبح 7 بجے سے صبح 11 بجے تک اور شام 4 بجے سے شام سات بجے تک میٹرو خدمات دستیاب رہے گی۔

اسی مرحلے میں 10 ستمبر کو لائن ایک (ریٹھالہ سے شہید استھل) لائن پانچ (گرین لائن) کیرتی نگر۔ اندرالوک سے بریگیڈیئر ہوشیار سنگھ اور لائن چھ (وایلیٹ لائن) کشمیری گیٹ سے راجہ نہار سنگھ تک چلے گی اور اس کا وقت بھی صبح اورشام کے چار چار گھنٹے کا ہو گا ۔ صبح 7 بجے سے صبح 11 بجے اور شام 4 بجے سے شام سات بجے تک میٹرو خدمات دستیاب رہے گی۔

دوسرے مرحلے میں میٹرو خدمات 11 ستمبر سے شروع ہوں گی اور اس میں میٹرو ٹرین کے سفر کا وقت چار گھنٹے سے بڑھا کر چھ گھنٹے کردیا گیا ہے۔ دوسرے مرحلے میں پہلے مرحلے کی لائنوں کے علاوہ لائن آٹھ (مینجیٹا لائن) جنک پوری ویسٹ سے بوٹینیکل گارڈن اور لائن نو (گرے لائن) دوارکا سے نجف گڑھ کی شروعات ہوگی۔ اس کا وقت صبح 7 بجے سے گیارہ بجے اور شام 4 بجے سے رات 10 بجے تک رہے گا۔ تیسرے مرحلے میں 12 ستمبر سے سبھی لائنوں پر پورے دن میٹرو ٹرین صبح 6 بجے سے رات 11 بجے تک دستیاب رہیں گی۔ اس مرحلے میں لائن ایک اور دو کے علاوہ (ائیرپورٹ ایکسپریس لائن)، نئی دہلی سے دوارکا سیکٹر 21 آپریشن ہو گا۔

انہوں نے بتایا کہ مرکزی وزارت برائے شہری ترقی کی جانب سے جاری کردہ ایس او پی کے تحت میٹرو اسٹیشن کے داخلی مقامات پر تھرمل اسکریننگ کے بعد ہی مسافروں کو داخلہ دیا جائے گا اور ممنوعہ علاقے کے تمام اسٹیشنوں پر لوگوں کے داخلے اور باہر جانے کی ممانعت ہوگی۔ مسافروں اور عملے کے لئے فیس ماسک لازمی ہوں گے۔