میٹرو ملازمین کی تنخواہوں میں کٹوتی

کورونا وبا کی وجہ سےہر سیکٹر بری طرح متاثر ہے اور دہلی میں تقریبا پانچ ماہ سے میٹرو ریل بند ہے ۔میٹرو کے بند ہونے سے مسافروں کو تو پریشانی ہو ہی رہی ہے لیکن اب یہ پریشانی میٹرو کے ملازمین کے لئے بھی ہو گئی ہے کیونکہ دہلی میٹرو ریل کارپوریشن (ڈی ایم آر سی) نے حکم جاری کیا ہے کہ وہ اگست ماہ سے اپنے ملازمیں کی تنخواہوں میں کٹوتی کرنے جا رہا ہے۔

ڈی ایم آر سی نے جو حکم جاری کیا ہے اس کے مطابق ملازمین کو جوسہولیات اور بھتے کی رقم ملتی تھی اس میں پچاس فیصد کی کٹوتی کر دی گئی ہے ۔ اس حکم کے مطابق اگست ماہ سے ملازمین کو سہولیات اور بھتہ بیسک تنخواہ کا 15.75فیصد ہی ملے گا۔ واضح رہے ڈی ایم آر سی کے ملازمین طبی علاج، سفر کرنے کا بھتہ اور ڈی اے کا فائدہ لیتے رہ سکتے ہیں۔

ڈی ایم آر سی کے نئے حکم کے مطابق ملازمین اب اگلے حکم تک کوئی ایڈوانس نہیں لے سکتے کیونکہ ایڈوانس لینے پر روک لگا دی گئی ہے۔ایڈوانس کے تعلق سے کہا گیا ہے کہ جو ایڈوانس پہلے سے منظور ہے وہ ایڈوانس مل جائےگا۔

واضح رہے دہلی میں میٹرو خدمات مارچ کے مہینے سے ہی بند ہیں اور ڈی ایم آر سی کے ذرائع نے بتایا تھا کہ خدمات بند ہونے کی وجہ سے میٹرو کو دس کروڑ روپے یومیہ کا نقصان ہے او ر اس وجہ سے اب تک تین سو کروڑ روپے سے زیادہ کا نقصان ہو چکا ہے۔واضح رہے دہلی میٹرو سے روزانہ تیس لاکھ سے زیادہ لوگ سفر کرتے ہیں ۔