دہلی: ایمبولنس کے فریزر میں مردہ کی جگہ تھیں شراب کی بوتلیں، اسمگلر گرفتار

راجدھانی دہلی میں پولس چوکسی سے پریشان شراب اسمگلر اپنے کاروبار کے لیے روزانہ نئے فارمولے تلاش کر رہے ہیں۔ ابھی تک اسمگلر کوکنگ گیس سلنڈر، سبزی، دودھ کے ڈرم یا پھر سائیکل، موٹر سائیکل کے ٹیوب کا شراب اسمگلنگ کے لیے استعمال کرتے رہے ہیں۔ لیکن تازہ معاملہ نے گزشتہ سبھی فارمولے کو بہت پیچھے چھوڑ دیا، لیکن پولس کی چوکسی نے شراب اسمگلروں کے منصوبے کو ناکام بنا دیا۔ واقعہ ہریانہ کا ہے جہاں سے چوری چھپے دہلی میں شراب لا رہے اسمگلروں کو پولس نے گرفتار کر لیا۔ شراب اسمگلروں کا یہ گروپ ایمبولنس کے اندر لاش رکھنے کے لیے ائیرکنڈیشن 'فریزر' کا استعمال شراب کی پیٹی کے لیے کرتے ہوئے پکڑے گئے۔

جمعرات کو یہ جانکاری دوارکا ضلع کے ڈی سی پی انٹو الفانسو نے دی۔ انھوں نے کہا کہ "گرفتار ملزمین کے نام ہریش لوہیا اور دیویندر ہیں۔ ہریش لوہیا دہلی کے وسنت وہار کا باشندہ ہے جب کہ دیویندر کمار دہلی کے ہی کسم پور پہاڑی کا باشندہ ہے۔ ان کے پاس سے 25 پیٹی شراب کو قبضے میں لیا گیا ہے۔ ملزمین کے پاس سے برآمد ایمبولنس کو بھی ضبط کر لیا گیا ہے۔"

یہ گینگ اس وقت پکڑا گیا جب اس کے رکن ایمبولنس میں بیٹھ کر چھابلا گاؤں کی جانب سے قطب وِہار کی جانب جا رہے تھے۔ ڈی سی پی کا کہنا ہے کہ "اس گینگ کو پکڑنے کے لیے اے سی پی اشوک تیاگی کی قیادت میں ٹیم بنائی گئی تھی۔ ٹیم میں ایس ایچ او چھابلا انسپکٹر گیانیندر رانا، حولدار ایشور، سپاہی مہندر اور پردیپ کو شامل کیا گیا تھا۔"

قطب وِہار شمشان گھاٹ کے پاس پولس بیریکیڈ لگا دیکھ کر ایمبولنس نے جب رفتار دھیمی کی تو اسی وقت ایمبولنس میں موجود لوگوں پر شک ہوا۔ پوچھ تاچھ کے دوران جب سختی کی گئی ان لوگوں نے سچ بتا دیا۔ جب ایمبولنس میں رکھے ڈیڈ باڈی فریزر کو چیک کیا گیا تو اس میں شراب سے بھری ہوئی پیٹیاں نظر آئیں۔