دہلی شراب پالیسی معاملہ: کویتا کی درخواست ضمانت منظور، سپریم کورٹ نے ہائی کورٹ کے فیصلے کو کیا مسترد

نئی دہلی: سپریم کورٹ نے منگل کے روز دہلی شراب پالیسی معاملہ میں بی آر ایس کی رہنما کویتا کی درخواست ضمانت منظور کر لی۔ عدالت نے اپنے فیصلے میں سی بی آئی اور ای ڈی کی تفتیشی کارروائیوں پر سخت اعتراض کیا اور ان کے طریقہ کار پر سوال اٹھائے۔ خیال رہے کہ تلنگانہ کے سابق وزیر اعلیٰ کے چندر شیکھر راؤ کی بیٹی کے کویتا 15 مارچ سے پولیس حراست میں تھیں۔

سپریم کورٹ نے وضاحت کی کہ سی بی آئی اور ای ڈی کی تفتیش میں شفافیت کی کمی ہے اور ان کی کچھ دلیلیں درست نہیں ہیں۔ عدالت نے کہا کہ کسی بھی ملزم کو ٹھوس ثبوت کے بغیر طویل عرصے تک حراست میں نہیں رکھا جا سکتا اور تفتیشی ایجنسیوں کی کارروائیوں پر برہمی کا اظہار کیا۔

دریں اثنا، سپریم کورٹ نے دہلی ہائی کورٹ کے اس حکم کو مسترد کر دیا جس میں ہائی کورٹ نے کے کویتا کی ضمانت کی درخواست مسترد کر دی گئی تھی۔ سپریم کورٹ کے کویتا کو دونوں معاملوں میں 10 لاکھ روپے کے ضمانتی مچلکے پیش کرنے، گواہوں کے ساتھ چھیڑ چھاڑ نہ کرنے اور گواہوں کو متاثر نہ کرنے کی شرط پر ضمانت دینے کی ہدایت دی گئی ہے۔

کویتا کے وکیل نے عدالت کے فیصلے کا خیرمقدم کیا اور اسے انصاف کی فتح قرار دیا۔ انہوں نے امید ظاہر کی کہ مستقبل میں اس کیس میں صحیح اور منصفانہ تحقیقات ہوں گی۔ دہلی شراب پالیسی معاملہ کی تفتیش کے دوران دیگر ملزمان بھی تحقیقات کے دائرے میں ہیں۔ دہلی کے وزیر اعلیٰ اروند کیجریوال بھی اس معاملہ میں ملزم ہیں اور تاحال جیل میں قید ہیں۔