دہلی کے چار بڑے اسپتالوں میں 6 سال کے اندر 5724 بچوں کی موت! آر ٹی آئی سے انکشاف
آر ٹی آئی کے تحت ملے جواب کے مطابق اس دوران ان استپالوں میں 3.46 لاکھ سے زیادہ بچوں کی پیدائش ہوئی، جن میں سے 5724 بچے فوت ہو گئے، صرف صفدر جنگ اسپتال میں ہی 4 ہزار سے زیادہ بچوں کی موت واقع ہوئی۔
نئی دہلی: دہلی میں واقع مرکزی حکومت کے چار اسپتالوں میں ساڑھے چھ سالوں کے دوران ہر ماہ اوسطاً 70 بچوں کی موت ہوتی ہے۔ سب سے زیادہ خراب حالت صفدر جنگ اسپتال کی ہے جہاں 81 مہینے سے ہر ماہ تقریباً 50 نومولود کی جان چلی گئی۔
یہ بھی پڑھیں : عام آدمی کی آمدنی میں اضافہ ضروری ہے: اشوک گہلوت
صفدر جنگ اسپتال کے علاوہ آل انڈیا انسٹی ٹیوٹ آف میڈیکل سائنسز (ایمس)، کلاوتی سرن اسپتال اور سوچیتا کرپلانی اسپتال نے خبر رساں ایجنسی پی ٹی آئی کی جانب سے حق اطلاعات (آر ٹی آئی) قانون کے تحت دائر کی گئی علیحدہ درخواستوں کے جواب میں یہ معلومات فراہم کیں۔
آر ٹی آئی درخواست میں جنوری 2015 سے جولائی 2021 کے درمیان ان اسپتالوں میں فوت ہونے والے نوزائیدہ بچوں کی تعداد کے بارے میں معلومات مانگی گئی تھیں۔ اس کے ساتھ یہ بھی پوچھا گیا تھا کہ ان بچوں کی موت کی وجوہات کیا ہیں؟
صفدرجنگ اور سوچیتا کرپلانی اسپتالوں نے ستمبر 2021 تک کا ڈیٹا فراہم کیا ہے۔ آر ٹی آئی کے تحت موصول ہونے والے جواب کے مطابق اس مدت کے دوران ان اسپتالوں میں 3.46 لاکھ سے زیادہ بچے پیدا ہوئے، جن میں سے 5724 بچوں کی موت ہو گئی۔
یہ بھی پڑھیں : کیا امریکہ پوتن کا حشر صدام جیسا کرے گا!... ظفر آغا
کل اموات میں سے چار ہزار سے زیادہ بچوں کی جان صرف صفدر جنگ اسپتال میں ہی چلی گئی۔ تاہم صفدرجنگ اسپتال میں پیدا ہونے والے بچوں کی تعداد سب سے زیادہ ہے۔ کلاوتی سرن اسپتال کے علاوہ دیگر اسپتالوں نے بچوں کی موت کی وجہ نہیں بتائی، جبکہ رام منوہر لوہیا اسپتال نے بچوں کی اموات کی تعداد نہیں بتائی۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔