دہلی وقف بورڈ میں چیئرمین کے انتخاب پرعدالت کی روک

دہلی ہائی کورٹ نے پیر کوعام آدمی پارٹی حکومت سے کہا کہ وہ ممبراسمبلی امانت اللہ خان کو وقف بورڈ کا چیئرمین بنانے کی اجازت کیسے دے سکتی ہے جبکہ ان کے خلاف بے ضابطگیوں کے الزامات کی تحقیقات کے لئے سوشل آڈٹ شروع کیا گیا ہے۔ جسٹس ہما کوہلی اور جسٹس سبرا منیم پرساد پر مشتمل بنچ نے مفاد عامہ کی ایک عرضی پر سماعت کے دوران دہلی حکومت سے یہ سوال کیا۔ عرضی میں اس نوٹیفکیشن کو منسوخ کرنے کی درخواست کی گئی تھی جس میں امانت اللہ خان سمیت وقف بورڈ کے ممبران میں سے بورڈ کے چیئرمین کا انتخاب کرنے کے لیے پیرکی میٹنگ طلب کی گئی ۔

بنچ نے کہا کہ مسئلہ یہ ہے کہ کیا بے ضابطگیوں کے سنگین الزامات کا سامنا کررہے شخص کو بورڈ کا چیئرمین بنانے کی اجازت دی جانی چاہئے جب کہ دہلی حکومت نے ان کے خلاف الزامات پرسوشل آڈٹ کا حکم دیا ہے۔ بینچ نے کہا کہ انہیں نظام کا حصہ ہی کیوں بننے دینا چاہئے جب ان کے خلاف سنگین الزامات ہیں۔

عرضی گزار محمد اقبال خان کی جانب سے وکیل وجے کے توسط سے داخل مفاد عامہ کی عرضی پر سماعت کرتے ہوئے بینچ نے یہ بات کہی۔ دہلی حکومت کی جانب سے ایڈیشنل سالیسیٹر جنرل (اے ایس جی) سنجے جین نے کہا کہ بورڈ کا خصوصی آڈٹ سے کوئی لینا دینا نہیں ہے اور اس کے نتائج براہ راست طور پرحکومت کو بتائے جائیں گے۔اس پر بینچ نے پوچھا کہ کیا مسٹر خان چیئرمین عہدے کے لیے دعویداری کرنا چاہتے ہیں؟

امانت اللہ خان کی جانب سے ایڈووکیٹ کے سی متل نے بینچ سے کہا کہ اگر کوئی ممبران کے نام کی تجویز رکھتا ہے تو وہ لڑیں گے۔ عدالت نے کہا کہ عرضی میں اٹھائے گئے معاملے پر غور کرنے کی ضرورت ہے اور وقت کی کمی کی وجہ سے پیر کو یہ ممکن نہیں ہے۔ اے ایس جی جین نے کہا کہ چیئرمین کے انتخاب کے لئے بورڈ کی میٹنگ 19 نومبر تک ملتوی کی جائے گی۔ اس کے بعد بینچ نے اگلی سماعت کے لیے 9 نومبر کی تاریخ طے کردی۔