کورونا پر فتح حاصل کر کام پر لوٹے وزیر صحت ستیندر جین، کہا 'کمیونٹی اسپریڈ ہے لیکن...'

دہلی کے وزیر صحت ستیندر جین ایک بار پھر اپنی ذمہ داری سنبھالنے کے لیے دفتر میں قدم رکھ چکے ہیں۔ کورونا پر فتح حاصل کرنے کے بعد ستیندر جین کچھ دنوں تک گھر پر آرام کر رہے تھے اور پوری طرح صحت یاب ہو کر اب وہ میدان میں واپس آ چکے ہیں تاکہ دہلی سے کورونا کے خاتمہ کو یقینی بنایا جائے۔ اس درمیان انھوں نے کمیونٹی اسپریڈ کی بات کہی ہے، لیکن ساتھ ہی کہا ہے کہ اس سلسلے میں مرکزی حکومت اور ڈبلیو ایچ او کو فیصلہ کرنا ہے کیونکہ اس سلسلے میں کچھ تکنیکی باتوں پر غور کرنا لازمی ہوتا ہے۔

قابل ذکر ہے کہ ستیندر جین نے دہلی میں کورونا کے کمیونٹی اسپریڈ سے متعلق ذاتی بیان جون میں ہی دیا تھا لیکن مرکزی حکومت نے اس سے انکار کر دیا تھا۔ آج کمیونٹی اسپریڈ کی حالت پر ستیندر جین نے ایک ہندی نیوز پورٹل سے بات چیت کے دوران کہا کہ "میرے ماننے سے فرق نہیں پڑتا۔ میں پہلے بھی کہہ رہا تھا کہ کمیونٹی اسپریڈ ہے کیونکہ ایک لاکھ کیس ہو چکے ہیں۔ کافی بڑے اسکیل پر ہے اور کئی لوگوں میں پتہ نہیں چلتا۔ لیکن تکنیکی طور پر ڈبلیو ایچ او یا مرکزی حکومت بتائے گی کہ کمیونٹی اسپریڈ ہے یا نہیں۔"

آج تقریباً ایک مہینے کے بعد دفتر پہنچنے اور اپنی ذمہ داری سنبھالنے کے تعلق سے ستیندر جین نے کہا کہ "یہ بالکل گھر واپسی جیسا لگ رہا ہے۔ نہ اسپتال میں دل لگ رہا تھا نہ گھر پر۔ بار بار لگتا تھا کہ دفتر چلا جائے، فیلڈ میں جائیں۔ اتنے طویل وقت کے لیے بریک کبھی بھی زندگی میں آیا ہی نہیں۔" بات چیت کے دوران کورونا سے لڑائی کا اپنا ذاتی تجربہ بیان کرتے ہوئے وزیر صحت نے کہا کہ ذہنی طور پر مضبوط ہونا ضروری ہے۔ وہ کہتے ہیں کہ "جب بھی ڈاکٹر پوچھتے کہ کیسے ہو؟ تو میں کہتا تھا کہ 'ٹھیک ہوں'۔ ڈاکٹر کئی بار ہنستے تھے اور کہتے تھے کہ آپ بالکل ٹھیک سے کم نہیں ہوں گے کبھی۔"

کورونا انفیکشن سے لڑ کر اپنے صحت مند ہونے کا تجربہ بیان کرتے ہوئے انھوں نے یہ بھی کہا کہ "تجربہ کے بعد میں یہ کہہ سکتا ہوں کہ آپ کو اپنا ذہنی سیٹ اَپ مضبوط رکھنے کی ضرورت ہے، ڈرنے کی ضرورت نہیں ہے۔ جو ہونا ہے وہ تو اوپر والے کے ہاتھ میں ہے، آپ کے ہاتھ میں یہ ہے کہ خود کو مضبوط رکھیں۔ خود کو مضبوط رکھنا بہت ضروری ہے۔"