گردوارہ بنگلہ صاحب میں پچاس روپے میں ایم آر آئی، 600روپے میں ہوگی ڈائلیسس

دہلی سکھ گردوارہ پربندھک کمیٹی (ڈی ایس جی ایم سی) نے گردوارہ بنگلہ صاحب کمپلکس میں واقع گرو ہرکرشن پالی کلینک میں غریبوں کے لئے پچاس روپے میں ایم آر آئی اور 600روپے میں ڈائلیسس سروس شروع کرنے کا اعلان کیا ہے۔

جرمنی سے مشینیں آنے کے بعد دسمبر سے ایم آر آئی کی سہولت شروع ہوجائے گی۔ کمیٹی کا دعوی ہے کہ یہاں ملک ہی نہیں بلکہ دنیامیں سبب سےکم قیمت پر یہ سہولیات ملیں گی۔

ڈی ایس جی ایم سی کے صدر منجندر سنگھ سرسہ اور جنرل سکریٹری ہرمیت سنگھ کالکا نے نامہ نگاروں کو بتایا کہ اقتصادی طورپر کمزور لوگوں کے لئے پچاس روپے میں ایم آر آئی کی سہولت دسمبر مہینہ میں شروع ہوگی۔ اس کے علاوہ ایک دیگر زمرہ بنایا گیا ہے جس میں دہلی گردوارہ پربندھک کمیٹی کے اراکین کی تصدیق پر اپنے علاقہ کے لوگوں کی ایم آر آئی صرف اصل خرچ پر کی جائے گی۔

دونوں لیڈروں نے بتایا کہ پالی کلینک میں ڈائلیسس کی سروس شروع کی جارہی ہے جو اسی مہینہ شروع ہوجائے گی اور غریب مریضو ں کا 600 روپے میں ڈائلیسس کیا جائے گا جبکہ عام طورپر بازار میں اس کی قیمت 4000روپے یا اس سے زیادہ ہے۔ یہاں علاج کرتے وقت مذہب کی بنیاد پر کوئی تفریق نہیں ہوگی اور کسی بھی مذہب کے لوگ یہاں آکر اس سہولت کا فائدہ اٹھا سکتے ہیں۔ مسٹر سرسہ نے کہاکہ ہم گرو صاحب کے دکھائے رائے پر چلتے ہوئے یہ سروس شروع کررہے ہیں۔

مسٹر سرسہ نے بتایا کہ جرمنی کی ایک کمپنی ایم آر آئی مشینوں کا آرڈر دے دیا گیا ہے اور یہ مشینیں آنے کے بعد دسمبر سے ایم آر آئی کی سہولت شروع ہوجائے گی۔