دہلی: ہوٹل میں ہولناک آتشزدگی، 17 افراد لقمہ اجل، عمارت سے کود گئے لوگ

نئی دہلی: قومی راجددھانی دہلی کے قرول باغ میں واقع ہوٹل ارپت پیلیس میں منگل کی صبح آگ لگ جانے سے تین خواتین اور ایک بچہ سمیت 17 لوگوں کی موت اور تین دیگر جھلس گئے جبکہ 25 لوگوں کو بحفاظت باہر نکال لیا گیا۔

مرنے والوں میں سے 13 لوگوں کی لاشیں رام منوہر لوہیا اسپتال میں رکھی گئی ہیں۔ اس کے علاوہ دو لوگوں کی لاشیں لیڈی ہارڈنگ اسپتال میں اور باقی دو لوگوں کی لاشیں بی ایل کپور اسپتال میں ہیں۔ زخمیوں میں ایک خاتون بھی شامل ہے جن کا علاج چل رہا ہے۔

فائر بریگیڈ کے افسر نے بتایا کہ آج صبح 4.35 بجے ہوٹل ارپت پیلیس میں آگ لگنے کی اطلاع ملی۔ آگ کی اطلاع ملتے ہی فوری طورپر فائر بریگیڈ کی گاڑیوں کو موقع پر بھیجا گیا۔ ذرائع نے بتایا کہ آگ لگنے کے بعد کئی لوگوں نے ہوٹل کی کھڑکیوں سے چھلانگ لگاکر اپنی جان بچانے کی کوشش کی۔

فائر بریگیڈ کے افسر وپن نے بتایا کہ فی الحال آگ پر قابو پا لیا گیا ہے۔ انہوں نے بتایا کہ فائر بریگیڈ کی 30 گاڑیوں نے کئی گھنٹوں کی سخت مشقت کے بعد آگ پر قابو پایا۔ موقع پر اب ریسکیو آپریشن ختم کر دیا گیا ہے۔ افسر نے بایا کہ کوریڈور میں لگی لکڑی کی چوکھٹ میں زبردست آگ لگی تھی، اس وجہ سے لوگ اس طرف سے نہیں کل پائے۔

فائر بریگیڈ کے افسر نے بتایا کہ آگ لگنے کے بعد کئی لوگوں نے عمارت سے چھلانگ لگا دی۔ انہوں نے بتایا کہ تاحال آگ لگنے کی وجوہات معلوم نہیں ہو سکی ہے، معاملہ کی جانچ کی جا ری ہے۔ ادھر پولس نے معاملہ درج کر لیا ہے اور معاملہ کی جانچ کی جا رہی ہے۔